ޖަޒުބާތުގައި

" ބައްޕާ!"
މާހިންގެ އަޑު ޖައުފަރުގެ ކަންފަތަށް ވަދެގެން ދިއައީ ތޫނު ތީރެއް ހެންނެވެ. 
" ހަބަރުދާރް!"
ޖައުފަރު ބާރަށް އެނބުރިލި އިރު އޭނާގެ ދެލޯ ވެސް ހީވަނީ އަނގުރު އަލިފާން ކޮޅެއް ހެންނެވެ. 
" ދެން ކަލޭ އަހަންނަށް ބައްޕަ ނުކިޔާތި! އެ ޙައްޤު ކަލޭ އަމިއްލައަށް ނިގުޅައިގެންފި!"
ބައްޕަގެ އަޑު އިވުމުން މާހިން ދެރަވީ އެކަންޏެއް ނޫނެވެ. އޭނާ އިންތިހާއަށް ލަދު ގަތެވެ. ކިތަންމެ ހިތްހަމަ ނުޖެހުނަސް މިމީގެ ކުރިމަތީގައި ބައްޕަ އެގޮތަށް ކަންތައް ކޮށްފާނެ ކަމަކަށް މާހިން ހިއެއް ނުކުރެ އެވެ.
" މިއަދު ކަލޭ ތި ސާބިތު ކޮށްދިނީ ކަލޭތީ އަހަރެންގެ ދަރިއެއް ނޫންކަން!" 
ޒިޔާދާގެ ދެލޯ ބޮޑުވެގެން ދިއަ އެވެ. ޖައުފަރު ކޮށްފާނެ ކަމަކާއި ދޭތެރޭގައި އޭނާ ބިރު ގަތެވެ. ޖައުފަރު ހުރީ ހެދޭނެހެދޭ އިނގޭ ވަރަށް ވުރެ ބޮޑަށް ރުޅިގަދަވެފަ އެވެ. 

" ކަލޭ އެބައެއްގެ ބަސް ޤަބޫލު ކޮށްގެން އަހަންނާ އިދިކޮޅު ހަދަން ޖެހުނު ބައެއްގެ ކައިރިއަށް ދޭ!" 
ގަދަ ރުޅީގައި މާހިން އާއި ދިމާއަށް ލޯ ވައްކޮށްގެން ހުރެ އަޑުގެ ކޮޅަށް ހަޅޭއްލަވަމުން ދިއައިރު މާހިންގެ ފުރަގަހަށް ވަދެ އިސް ޖަހާލައިގެން ހުރި މިމީ ޖައުފަރަކަށް ނުފެނެ އެވެ. ނުފެންނަނީ އެއް ނޫނެވެ. ބަލާލަން ވެސް ބޭނުން ނުވަނީ އެވެ. ޖައުފަރު ކިއަން ބޭނުން އެއްޗެހި އަދި ނިމުނީއެއް ނޫނެވެ. ހަމަ އެކަނި އެއްޗެހި ކިޔާލާފައި ހުއްޓާ ލެވޭކަށް މިއަދަކު ނެތެވެ.

" ކަލޭ ތި ގޮތުގަ ހުރިހާ ދުވަހަކު ކަލެއަށްޓަކައި މިގޭގެ ދޮރު ވަނީ ބަންދުވެފަ!" 
މާހިންއަށް މަންމައަށް ބަލައި ލެވުނީ ޤަބޫލު ނުކުރެވިފަ އެވެ. ޒިޔާދާވެސް ހުރީ ބުނާނެ އެއްޗެއް ނޭގިފަ އެވެ. މާހިން މިމީ އާއި ކައިވެނި ކޮށްފިއްޔާ އެހެން ވާނެ ކަން އޭނާއަށް ކުރީންވެސް އެނގުނެވެ. 

" މިއަދުން ފެށިގެން އަހަރެންނާ ކަލެއަކާ އެއްވެސް ގުޅުމެއް ނޯންނާނެ!"
މާހިންގެ ލޮލުގެ ތެރެއަށް ކަރުނަ ގިނަވެގެން ދިއަ އެވެ. އެއްވެސް ސަބަބަކާ ހެދި ބައްޕަ އޭނަޔާއި ގުޅުން ކަނޑާލާ ހިސާބަށް ހިނގާދާނެ ކަމަކަށް އޭނާ ހިއެއް ނުކުރެ އެވެ.

މާހިންގެ މޫނު މަތީގެ ހިތާމަ ވެރި އަސަރުން ޒިޔާދާގެ ހިތް ރޮއްވާލި ނަމަވެސް އެއިން އެއްވެސް އަސަރެއް ޖައުފަރަކަށް ނުފެނެ އެވެ. ދަރިފުޅުގެ ގައިގައި މިވަގުތު ބައްދާލަން ޒިޔާދާ ބޭނުން ވިއެވެ. އަދި ހިތްވަރު ކޮށްލާށޭ، މަންމަ އަބަދުވެސް ހުންނާނީ ދަރިފުޅާއި އެކުގައޭ ބުނެލަން ވެސް ބޭނުން ވިއެވެ. އެހެން ނަމަވެސް އިވިގެން ދިއަ އަޑުން އޭނާގެ އެ އިޙުސާސްތަކަށް ހުއްޓުމެއް އައެވެ. 

" އަދި މިގޭން މީހަކު ކަލެއާ ގުޅުމެއް ބާއްވައިފިއްޔާ އެމީހަކީ އަހަންނާ ގުޅުމެއް ނެތް މީހެއް!" 
އެއީ ޖައުފަރުގެ ފަހު ބަހެވެ. ޖައުފަރާ ތައުފީޤްގެ ހަސަދައިގެ ތެރެއިން ޒިޔާދާގެ މުޅި އާއިލާ ފޮތިފޮތި ކޮށްލެވުނީ އެވެ. އެހެން ބުނެފައި ޖައުފާރު ދާން ބާރަށް ހިނގައި ގަތެވެ. ޒިޔާދާ ބޭނުންވީ މާހިން ގާތުގައި އެއްޗެއް ބުނެލާށެވެ. އެހެން ނަމަވެސް ޖައުފަރު އެތެރެއަށް ވަނުމުގެ ކުރިން އަތުގެ އިޝާރާތުން ޒިޔާދާއަށް އެންގީ އެތެރެއަށް ވަނުމަށެވެ. މަޖުބޫރު ވެފައިވާ މަންމަ އެތެރެއަށް ވަދެގެން ދާތަން ބަލަން ފެންކަޅި ވެފައި މާހިން ހުއްޓެވެ. އެންމެ ކުޑަމިނުން މަންމަގެ ހިނިތުން ވުމެއް ލިބުމުގެ ނަސީބުވެސް މިއަދު އޭނާއަށް ނުލިބުނެވެ. 

ފުން ނޭވާއެއް ދޫކޮށްލުމަށް ފަހު މާހިން މިމީއާއި ދިމާއަށް އެނބުރުނެވެ. މިމީގެ މޫނު މަތީން ފެންނަމުން ދިއަ ހިތާމަވެރި އަސަރަކީ މާހިން އަށްޓަކައިވާ އެއްޗެއް ކަން މާހިން އަށް އިނގެ އެވެ. ހަދާނެ ގޮތެއް ނޭގި ގޮތް ހުސްވެފައި މާހިން އިރުކޮޅަކު ހުއްޓެވެ. ކުއްލިއަކަށް ނުކުމެގެން ދާނެ ތަނެއް ވެސް އޭނާ އަކަށް ނޭގެ އެވެ. މިމީގެ ގޭގައި އެ ދެމަފިރީން ތިބޭނެ ތަނެއް ނެތެވެ. މިމީގެ އަތުގައި ހިފައިގެން މާހިން ބޭރަށް ހިނގައި ގަތެވެ. ގޭގެ ކާރަކަށް އަރާކަށް ވެސް ދެން ބޭނުމެއް ނޫނެވެ. ބައްޕަގެ އެއްވެސް އެއްޗަކީ މިހާރު އޭނާގެ އެއްޗެއް ނޫނެވެ. ގޭން ބޭރަށް ނުކުތް އިރު ބޭބެގެ ކާރު މަގުގެ އެއްފަރާތުގައި މަޑުކޮށްގެން އޮތްތަން ފެނުނެވެ. މާހިން ނުކުތުމާއި އެކު ދާއިން ކާރުން ފައިބާ ކާރުގެ ފަހަތު ސީޓުގެ ދޮރު ހުޅުވާލީ އެތެރެއަށް ވަނުމަށް މިމީއަށް އިޝާރާތް ކުރަމުންނެވެ. މާހިން ވެސް ކާރަށް އަރާ ދާއިންގެ ގާތުގައި އިށީނެވެ. 

ދާއިން ކާރު ދުއްވާލީ އޭނާ ބޭނުން ވާ މިސްރާބަކަށެވެ. މާހިން އެއްޗެއް ނުބުނެ އިނެވެ. ދާންވާ ތަނެއް މާހިން އަކަށް ނޭގެ އެވެ. 
" އައި ނިއު ދިސް ވުޑް ހެޕަން! "
އެހެން ބުނަމުން ދާއިން މާހިންގެ ކުރިމަތީގައި، ކާރުގެ ޑޭޝް ބޯޑް މަތީގައި ތަޅުދަނޑި ފައްޗެއް ބާއްވާލި އެވެ. 
" ޔުއަރ ނިއު ހޯމް!"
ބޭބެ އެހެން ބުނުމުން މާހިން ބަލާލީ ޙައިރާން ކަމާއި އެކުގަ އެވެ.

" ތީ ޔޫހާއާ އަހަރެންނާ ރައްޓެހި ވި ދުވަހުން ފެށިގެން ތައްޔާރު ކުރަމުން އަންނަ ތަނެއް! އަހަންނަށް އެނގުނު ބައްޕަ ޤަބޫލެއް ނުވާނެ ކަން އަހަރެން ޔޫހާއާ ކައިވެނި ކުރާކަށް. އެހެންވެ، ބެންގަލޫރުގަ ހުއްޓާ ޗީރާ ވަލީދު ތިތަން ވިއްކާލާކަން އެނގުނީމަ ގަތީ! ނައު އިޓްސް ފޯ ޔޫ!"
ބޭބެގެ ރަނގަޅުކަން ފެނުމުން މާހިންއަށް އިސް ޖަހާލެވުނެވެ. ލޮލުގައި ގިނަވެގެން ދިއަ ކަރުނަ ތިކިތައް ނިވާކޮށްލުމުގެ ގޮތުންނެވެ. ބޭބެ އެވަރަށް ބޭނުން ވެގެން އުޅުނު ތަނެއް އޭނާއަށް ދިނީތީ ދެރަވެސް ވިއެވެ. ބޭބެގެ އެ ހުވަފެންތައް މާހިންއަށްޓަކައި ގުރުބާން ކުރީއެވެ. 
" ކޮންތާކުން އެހާ ލާރި ހޯދީ! "
އިރުކޮޅެއް ފަހުން މާހިން އަހާލި އެވެ. ބައްޕައަށް ނާންގާ އެހާ ގިނަ އަދަދެއްގެ ފައިސާ ލިބި ދާނެހެން ހީނުވާތީ އެވެ. 

" އަދި ދެއްކުނީ އެއްބައި، ޔޫ ޑޯންޓް ވޮރީ! ބޭބެ އަނެއްބައި ދައްކާނަން ވަރަށް އަވަހަށް! ތިދެކުދީން ލޯބިކޮށް އެއްވެސް ފިކުރެއް ނެތި އުޅެލާ! އެމީހަކު ކައިވެނި ކުރާނެ މީހަކު އިނގޭނީ އެމީހަކަށް. ލޯބި ނުވާ މީހަކާ އިނދެގެން ދުވަހަކުވެސް އުފަލެއް ނުލިބޭނެ! ވަރަށް ގާތުން އަހަރުމެންނަށް އެމަންޒަރު އެބަ ފެނެއެއްނުން! ވީ ޝެލް ނޮޓް ރިޕީޓް އިޓް! "
ބޭބެގެ ވާހަކަ ތަކުން މާހިންއަށް އިތުރު ހިތްވަރެއް ލިބުނެވެ. އޭނާއާއި އެކުގައި ބޭބެ ހުރީތި އުފާކުރިއެވެ.

އެއީ ބޮޑު ތިން ކޮޓަރީގެ އެޕާރޓްމެންޓް އެކެވެ. މާ ބޮޑު ނޫނަސް ހިތްގައިމު ތަނެކެވެ. ދެމަފިރިއަކަށް ކަމުދެއެވެ. 
މާހިން އެނދުގައި އިށީދެލައިގެން އިނެވެ. އޭނާގެ ހަޔާތަށް އައި އެންމެ އުފާވެރި ދުވަސް ވެގެން އެ ދިޔައީ އެންމެ ހިތާމަ ވެރި ދުވަހަށެވެ. މާހިން ހީކުރީ ބައްޕަ ކިތަންމެ ހިތްހަމަ ނުޖެހިފައި ހުއްޓަސް ކައިވެނި ކުރީމައި އެކަން ހަމަޖެހޭނެ ކަމަށެވެ. ބައްޕަ ކިތަންމެ ރުޅިގަދަވެފައި ނުފޫޒު ގަދައަސް މާހިންމެން ދެކެ ވަރަށް ލޯބިވާކަމަށް މާހިން އަށް ޤަބޫލު ކުރެވުނީ އެވެ. އެންމެ ދެރަވީ މަންމައާއި އަނގައިން ބުނެ ނުލެވުނީމަ އެވެ. 

ފާޚާނާ ގެ ދޮރު ހުޅުވާލި އަޑަށް މާހިންއަށް އެދިމާއަށް ބަލައި ލެވުނެވެ. ދޮރުމަތީގައި ހުރި މިމީ ފެނުމާއި އެކު މާހިންގެ ހުރިހާ ހިތާމަތަކެއް ހަނދާނުން ފޮހެވިގެން ހިނގައްޖެ އެވެ. ހުދު ކުލައިގެ ތުނުތުނި ފޭރާމުގެ ދަށުން އެރީތި ހަށިގަނޑުގެ ފުރިހަމަކަން ފެނުނު ހިނދު މާހިންގެ ސިކުނޑި ތާޒާވެ، ހަށިގަނޑުގެ ލޭ ދައުރުވުން އަވަސް ވިއެވެ. މަޑުމަޑުން އޭނާއަށް ތެދުވެވުނެވެ. އެ މީރު ކަމުގެ އެހީގައި އޭނާ މުޅި ދުނިޔެވެސް ހަނދާން ނެތޭނެ ކަން ކަށަވަރެވެ!

ޝައުކަތާއި ޖައުފަރު ފޯނުން ދެއްކި ވާހަކަ އަޑު އިވުމުން އެންމެ އުފާވީ ނާމީއެވެ. މާހިން އާއި މިމީ ކައިވެނި ކުރުން އެއީ އޭނާގެ ނަސީބެވެ. އެ ޚަބަރު ލޫނާއަށް ދޭނީވެސް އޭނާއެވެ. ދާއިންގެ ފަރާތުން ޔޫހާއަށް އެޚަބަރު ދިއުމުގެ ކުރީން ނާމީ އެ ޚަބަރު ދޭން ބޭނުން ވިއެވެ. 

ނާމީ ލޫނާމެންގެ ގެއަށް ދިއައިރު ލޫނާ ސިޓިންގް ރޫމްގައި އިނެވެ. ނާމީ ފެނުމުންވެސް ލޫނާ މާބޮޑު ފަރުވާލެއް ނުބަހައްޓަ އެވެ. އޭނާ އަކަށް ނާމީ އެހާ މުހިއްމެއްވެސް ނޫނެވެ. އަބަދުވެސް އޭނާ އެ އިންނަނީ އިންތިޒާރު ގައެވެ. މާހިންގެ ޚަބަރެއް ވާނެ ގަޑިއަކަށް އިންތިޒާރު ކޮށްކޮށެވެ. މާހިން އެހެން މީހަކާއި ކައިވެނި ކުރާ ވާހަކަ ބުންޏަސް ލޫނާ އެކަން ޤަބޫލެއް ނުކުރެ އެވެ. މާހިންގެ ދެލޮލުން އޭނާއަށް ފެނުނު އޯގާތެރި ކަމުގެ ނިވަލުގައި ވަނީ ލޯބި ކަމުގައި އޭނާއަށް ޤަބޫލު ކުރެވުނެވެ. އަދިވެސް އޭނާ ޤަބޫލު ކުރާ ހިތް ވަނީ އެގޮތެވެ. 

ނާމީ އައިސް ލޫނާގެ ގާތުގައި އިށީނެވެ. ލޫނާ ފެނުމުން ނާމީގެ ހިތް އަވަސް ވެއެވެ. ކޮންމެވެސް ވަރަކަށް ނޭވާވެސް އަވަސްވެ އެވެ. މިއީ ނާމީއަށް އެހެން އަންހެނަކު ފެނިގެން ވީ ގޮތް ގޮތެއް ނޫނެވެ. ގިނަ އަދަދެއްގެ އަންހެނުން ތަޖުރިބާ ކުރެވުނު އިރު އެއިން ކޮންމެ އަންހެނަކުވެސް ނާމީގެ ކޮންމެ އިޝާރާތަކަށް އުފަލާއި އެކު މަރުހަބާ ކިޔެވެ. އެކަމަށް ނުހެއްލުނީ ޔޫހާއާއި ލޫނާ އެވެ. ޔޫހާ ދެކެ ނާމީ ވީ ލޯބި ނޫންކަން މިހާރު ނާމީއަށް އެނގެއެވެ. ނުލިބޭ އެއްޗެއް ހޯދަން ބޭނުންވުމުގެ އުސޫލުން އޭނާ ޔޫހާ ބޭނުންވީ އެވެ. އެހެން ނަމަވެސް މިހާރު ލޫނާ ދެކެ އޭނާ އެވަނީ ލޯތްބެވެ. އެކަން އޭނާއަށް ޔަޤީނެވެ. ކުރީން އިޙުސާސް ނުކުރެވޭ އެތައް އިޙުސާސެއް މިހާރު އެކުރެވެނީ އެހެންވެއެވެ. ކުރީން ހިތްދަތި ނުވާ ވަރަށް މިހާރު އެ ހިތްދަތި ވަނީ އެހެން ވެއެވެ. މިހާރު ނާމީ އަކަށް އެހެން އެއްވެސް އެއްޗެއް މުހިއްމެއް ނޫނެވެ. ލޫނާ މިލްކު ކުރުން ނޫން އަޒުމެއް އޭނާގެ ނެތެވެ. ލޫނާއަށްޓަކައި ފުރާނަވެސް ދުއްވާލަން އޭނާ ތައްޔާރެވެ. 

ލޫނާ ގާތުގައި މާހިންގެ ވާހަކަ ދެއްކުމުގެ ކުރީން އޭނާ ލޫނާއާއި ވާހަކަ ކޮޅެއް ދައްކާލަން މަސައްކަތް ކުރިއެވެ. ކުއްލިއަކަށް މާހިންގެ ވާހަކަ ފެއްޓުން ރަނގަޅެއްވެސް ނުވާނެ އެވެ.

" ލޫނާ ކީއްވެތަ އަހަންނާ އަނގައިން ނުބުނަނީ!"
ނާމީ އެހެން ބުނީ ހަޤީޤަތުގައިވެސް ވަރަށް ދެރަވެފަ އެވެ. 
" އަހަރެން ދުށީން ލޫނާ ..... އެހެން މީހަކާ ވާހަކަ ދެއްކިތަން!"
ނާމީ އެބުނީ މާހިންގެ ވާހަކަކަން ލޫނާއަށް އެނގުނެވެ. 
" އަހަންނަށް އިނގޭ ލޫނާއަށް ވާހަކަ ނުދެއްކެނީ ނޫންކަން....! ލޫނާ ހަމަ އަހަންނާ ވާހަކަ ދައްކަން ބޭނުން ނޫނީ!"
ނާމީ އިސް ޖަހާލީ ހިތްދަތި ވެފަ އެވެ. 
" ލޫނާއަށް އިނގޭދޯ އަހަރެން ..... ލޫނާ ދެކެ ވަރަށް ލޯބިވާކަން!"
ފުރަތަމަ ފަހަރަށް ނާމީގެ އަޑުގައި ވާ އަސަރު ލޫނާއަށް އިޙުސާސް ކުރެވިގެން ދިއައެވެ. ލޫނާގެ ހަށިގަނޑުގައި އާދަޔާ ޚިލާފް ރާޅުބާނީއެއް ދަތުރު ކޮށްލި އެވެ. އޭނާ ދެކެ މީހަކު ލޯބިވާ ވާހަކަ އެބުނީ އަލަށެވެ! ލޫނާ ނާމީއަށް ބަލާލި އެވެ. އިސް ޖަހައިގެން އިން ނާމީގެ މޫނުމަތީން ފެންނަމުން ދިއަ ކުލަވަރުންވެސް އޭނާއަށް ކޮށްފައިވާ އަސަރު ދޭހަވެ އެވެ. 

" އޮނަސްޓްލީ! އަހަރެން ދުވަހަކުވެސް އެހެން މީހަކު ދެކެ ލޯތްބެއްނުވޭ! އައި ލަވް ޔޫ ލޫނާ!"
އުނދަގުލުން ނާމީ އެހެން ބުނަމުން ލޫނާއާއި ހަތަރު ކަޅި ހަމަކޮށްލި އެވެ. އަވަސް އަވަހަށް ލޫނާ މޫނު އަނބުރާލި އެވެ. ނާމީގެ ދެލޮލުގެ ތޫނު އަސަރު އޭނާއަށް ވެސް އުނދަގޫ އިޙުސާސެއް ކުރުވައިފި އެވެ. ކުރީގެ ހަނދާންތައް ސިކުނޑިއަށް ވެރިވެ ގަތެވެ. އޭނާ ނާމީ ދެކެ ލޯބިވާކަމަށް ބުނި ދުވަސް ހަނދާނަށް އަތުވެއްޖެ އެވެ. އަދި އެލޯބީގެ ވާހަކަ އޭނާ ދެއްކި ސަބަބުވެސް ހަނދާން ވެއްޖެ އެވެ. ލޫނާގެ މަޤްސަދު ޙާޞިލް ވެއްޖެ އެވެ. ދޮންތީއާއި ދާއިން ގުޅިއްޖެ އެވެ. އެހެނަސް ނާމީ ވެސް މިހާރު އެވަނީ ބަދަލު ވެފަ އެވެ. ލޫނާއަށް އޭނާގެ އަމިއްލަ ނަފްސު ކުށްވެރި ކުރެވުނެވެ. ހަޤީޤަތާއި ޚިލާފް ވާހަކަ ތަކަކުން ނާމީގެ ހިތް ބަދަލު ކުރެވުނު ކަން އިޙުސާސް ކުރެވުނެވެ. 

" އަހަރެންވެސް މިހާރު އެބަ ބޭނުންވޭ މީހަކާ އިންނަން!"
ނާމީ ދުރު ބަލަން އިނދެ ވާހަކަ ދެއްކި އެވެ. ލޫނާ އިނީ ނާމީގެ މޫނަށް ބަލާށެވެ. 
" މިހާރު ހުރިހާ އެންމެންވެސް މީހުންނާ އިންނަނީ....!"
އެހެން ބުނަމުން ނާމީ ލޫނާގެ މޫނަށް ފަރުވާތެރި ކަމާއި އެކު ބަލާލި އެވެ.
" މާހިންވެސް މިހާރު މިމީއާ އިނދެފި!"
ލޫނާގެ ހިތް ފިތިގެން ދިއަހެން ހީވި އެވެ. ޤަބޫލު ކުރަން ދަތިވި އެވެ. އެހާ އަވަހަށް އެ ކައިވެނި ކުރެވުނީ ހެއްޔެވެ! ލޫނާ އުއްމީދު ކޮށްގެން ހުރީ ބައްޕަގެ ނުޤަބޫލުގައި އެކައިވެނި ކުރަން އިއުތިރާޒް ކުރުމަށް ފަހު މާހިން ލޫނާ ގާތަށް އައުމަށެވެ. މާހިން ވެސް އޭނާދެކެ ލޯބި ވީ ކަމަށް އޭނާއަށް ހީކުރެވުނެވެ. މާހިންގެ އޯގާތެރި ކަމާއި އަޅާލުމާއި، ލޯބިވެތި ބީހުންތައް ލޫނާއަށް އިޙުސާސް ކުރެވުނީ ނުބައި ކޮށްކަން އެނގުނު ހިނދު ނިކަމެތި ކަން އިޙުސާސް ކުރެވުނެވެ. ހަޤީޤަތުގައި މާހިން ލޫނާ ދެކެ ކުޑަކޮށްވެސް ލޯބި ނުވެއެވެ. އެހެންނަމަ އެހާ އަވަހަށް މިމީއާއި ކައިވެންޏެއް ނުކުރާނެ އެވެ. 

ލޫނާ އަވަސް އަވަހަށް އިސް ޖަހާލީ އޭނާގެ ދެލޯ ފުރިގެން އައި ކަރުނަތައް ނާމީއަށް ސިއްރު ކުރުމަށްޓަކައެވެ. އެހެން ނަމަވެސް ލޫނާއަށް ވެގެން ދިޔަ ގޮތް ނާމީއަށް ރީތިކޮށް ފެނުނެވެ. އެކަމަކާ ނާމީގެ ހިތްހަމަ ނުޖެހުމެއް ނެތެވެ. މާހިން ދެކެ ލޫނާއަށް ލޯބި ވެވުނީ ނާމީ ލޫނާގެ ލޯތްބަށް ފުރަގަސް ދިނުމުންނެވެ. ނާމީގެ ސަބަބުން ލޫނާއަށް އަނިޔާތަކެއް ލިބުނު ފަހުންނެވެ. އެކަން ނާމީ ދަނެއެވެ. ނާމީއަށް ގެއްލުނު ލޫނާގެ ލޯބި އަނބުރާ ހޯދުމަކީ ނާމީގެ ކަމެކެވެ. އެކަން އޭނާ ކުރާނެ އެވެ. 

ނާމީ ލޫނާގެ ކޮނޑުގައި ހިފަހައްޓާލަމުން ލޫނާ ގާތަށް ގެނެސް އޭނާގެ މޭގައި ޖައްސާލި އެވެ. ލޫނާއަށް ލިބުނު އެހީތެރިކަމަކީ މިވަގުތު އޭނާއަށް ބޭނުން އެހީތެރި ކަމެކެވެ. ނާމީގެ މޭގައި ލޫނާއަށް މޫނު ޖައްސާލެވުނެވެ. ހޫނު ކަރުނަތިކިތަކުން ނާމީގެ މޭމަތި ތެމެމުން ދިއައިރު ނާމީގެ ހިތުގައި ރިހެމުން ދާވަރު ލޫނާއަށް އިޙުސާސް ކުރެވޭބާ އެވެ!