ޖަޒުބާތުގައި

" ވާހަކައެއް ބުނަން!"
ބައްޕަގެ އަޑުގައި ވަނީ ހަރުކަށި ކަމެވެ.
" ބައްޕަ ތި ކައިވެންޏަކާ ޤަބޫލެއް ނޫން!"
މާހިން އަށް ލިބުނީ ސިހުމެކެވެ. އޭނާ ހީކުރީ މިމީގެ ބައްޕަ އާއި ވާހަކަ ދެއްކުމަށް ފަހު ހުރިހާ ކަމެއް ހަމަ ޖެހުނީ ކަމަށެވެ. އޭނާ މިމީގެ ގެއިން އެއައީ އެ އުފާ ފާހަގަ ކުރަމުންނެވެ.
" ބައް...!"
ސުވާލެއް ކޮށްލަން އަނގަ ހުޅުވާލެވުނެވެ. އެހެނަސް އެއްޗެއް ބުނެވޭ ވަރެއް ނޫނެވެ. ބައްޕަ ހިއްލާލި އަތް އެކަން ހުއްޓުވައިފި އެވެ. 
" އިތުރު އެއްވެސް ވާހަކައެއް އަޑުއަހާކަށް ބޭނުމެއް ނޫން.... އަހަރެންނަކީ ބައްޕަ ކަމަށް ޤަބޫލު ކުރަންޏާ ތިކަންތައް ހަމަ މިހާރުން މިހާރަށް ހުއްޓާލާ!"
އެހެން ބުނުމާއި އެކު މަޑުކޮށްލުމެއް ނެތި ބައްޕަ ހިނގައިގަތީ އެވެ. 

ކޮއްކޮއަށް ވެފައި ވާގޮތް ބަލަހައްޓައިގެން ދާއިން އަށް ވެސް ހުރެވުނީ އެވެ. ބައްޕަގެ އެ ނިންމުން ވަރަށް ހަރުކައްޓެވެ. އިންސާނިއްޔަތާއި ވެސް ހިލާފެވެ. ކައިވެންޏާއި ހިސާބަށް ގޮސްފައި ވަނިކޮށް ސަބަބެއްވެސް ބުނެދިނުމަކާއި ނުލާ އެގޮތަށް ކަންކުރަން މަޖުބޫރު ވުމުން ކޮއްކޮއަށް ވާނެ ގޮތް ބައްޕައަށް ހަމަ ނުވިސްނެނީ ހެއްޔެވެ!

މާހިން ކައިރީގައި ހުރި ސޯފާގައި އިށީނެވެ. ކުއްލިއަކަށް އޭނާގެ ހަށިގަނޑު މާބޮޑަށް ވަރުބަލި ވީ އެވެ. ދެފައިން ވެސް ބާރު ދޫވާ ގޮތް ވީ އެވެ. ޤަބޫލު ކުރަންވެސް ދައްޗެވެ! ބައްޕަގެ އެ ބަސްތަކަކީ ހަމަ ހަޤީޤަތެއް ބާއެވެ! ހިތްދަތި ހުވަފެނަކަށް ވާނެ ނަމަ ކިހާ ހެޔޮ ހެއްޔެވެ!

ދާއިން އަނގައިން ނުބުނެ އައިސް މާހިންގެ ކައިރީގައި އިށީންނަމުން މާހިންގެ ކޮނޑުގައި ހިފަހައްޓާލީ މިވަގުތު ކޮއްކޮއަށް އެހީތެރިކަން ބޭނުން ވެފައި ވާކަން އިނގޭތީ އެވެ. މާހިން އެއްޗެއް ނުބުނެ ދުރު ބަލަހައްޓައިގެން އިނެވެ. ބުނާނެ އެއްޗެއް އިނގޭނީ ކިހިނެއް ހެއްޔެވެ! ވިސްނާނެ އެއްޗެއް ވެސް މިވަގުތު އޭނާ އަކަށް ނޭގުނެވެ.

ޔޫހާ ހޮސްޕިޓަލުން އައިސް ހޮޓަލުގެ ރޫމަށް ވަންނަން ހިނގައިގެން އިރު ނާމީގެ ކޮޓަރީގެ ދޮރު ހުޅުވިފައި ވަނިކޮށް ފެނުނެވެ. ދޮރުހުޅުވާފައި ވީނަމަވެސް ކޮޓަރި ތެރޭގައި ވަނީ އަނދިރި ކަމެވެ. ރޭގަނޑުގެ އެގަޑީގައި ނާމީ ކޮޓަރީގައި ނޫޅެނިސް ކޮޓަރީގެ ދޮރު ހުޅުވިފައި ހުރީތީ އެތެރޭގައި މީހަކު އުޅޭތޯ ބަލާލަން ޔޫހާ ބޭނުންވި އެވެ. މަޑުމަޑުން ދޮރު ހުޅުވާ ބަލާލި އިރު ބިއްލޫރި ތަކުން ކޮޓަރިއަށް ވަދެފައިވާ އަލިކަމުގެ އެހީގައި ތަޅުން މަތީގައި އިށީނދެ އިން ނާމީ ޔޫހާއަށް ފެނުނެވެ. ޔޫހާ އިރުކޮޅަކު މަޑުކޮށްލުމުން ނާމީ ނަމާދު ކުރަނީ ކަން އެނގުނެވެ. އޭނާއިނީ ފަހު އައްތަހިއްޔާތުގަ އެވެ. ޔޫހާގެ ހިތަށް ފިނި ކަމެއް އިޙުސާސް ކުރެވުނެވެ. ނާމީއަކީ ނަމާދު ކޮށް އުޅޭ މީހެއް ކަމެއް އޭނާ އަކަށް ކުރިއަކުން ނޭގެ އެވެ. ނަމާދަށް ފަހުގައި ނާމީ ދިގު ދުޢާ އެއް ކުރި އެވެ. ލޯ މަރާލައިގެން އިނދެ އެވެ. އެވަގުތު އެތަނުގައި ޔޫހާ ހުއްޓާ ނާމީއަށް ފެނުމަކީ އެންމެ ކަމުދާ ކަމެއް ކަމަށް ޤަބޫލު ނުކުރެވޭތީ ޔޫހާ މަޑުމަޑުން ދޮރު ގާތް ކޮށްލާފައި ބޭރުގައި މަޑުކޮށްލި އެވެ. ނާމީއާއި ވާހަކައެއް ދައްކާލާފައި ނޫނީ އެތަނުން ދާކަށް އޭނާގެ ހިތެއް ނޭދުނެވެ. އިރުކޮޅަކަށް ފަހު ޔޫހާ ދޮރުގައި ޓަކިޖަހާލި އެވެ. ނާމީ ކޮޓަރީގެ ބޮކި ތައް ދިއްލާލުމަށް ފަހު ދޮރު ހުޅުވާލި އެވެ. ނާމީގެ އިޒުނަ އަކަށް މަޑު ކުރުމެއް ނެތި ޔޫހާ އެ ކޮޓަރީގެ ތެރެއަށް ހިނގައި ގަތެވެ. ނާމީ އެކަނި އުޅޭ ކޮޓަރިއަކަށް ވަންނަން ކުރީން ބިރުގެން ނަމަވެސް ޔޫހާގެ ހިތުގައި މިއަދަކު އެއްވެސް ބިރުވެރި ކަމެއް ނެތެވެ.

އެނދު ކައިރީގައި ހުރި ސޯފާގައި ޔޫހާ އިށީނެވެ. މީގެ ކުރީން ކޮއްކޮގެ އެއްވެސް ވާހަކައެއް އޭނާ ނާމީއާއި ޝެއަރ ކުރާކަށް ބޭނުމެއް ނުވެ އެވެ. އެހެން ނަމަވެސް އޭނާގެ ހިތުގައި ބޮޑުވެފައިވާ ބައެއް ވާހަކަ ނާމީއާއި ހިއްސާ ކޮށްލުމަކީ އެންމެ ރަނގަޅު ކަމެއް ކަމަށް އޭނާއަށް ޤަބޫލު ކުރެވުނެވެ.

" ކޮއްކޮއަށް ލިބުނު ޝޮކްގަ..... ވަރަށް ބޮޑެތި ގެއްލުންތައް ވަނީ ލިބިފަ.... އަދިވެސް ފިޔަވަޅެއްވެސް ނޭޅޭ.... ހަރު އެއްޗެއް ނުކެވޭ.... ވާހަކަ ދެއްކޭ ކަމެއްވެސް ނޭގޭ!"
އެހާ ހިސާބަށް ބުނިތަނާ ޔޫހާއަށް ރޮވިއްޖެ އެވެ. ނާމީ ވެސް ޖެހުނީ ހިތްވަރުގަދަ ކުރާށެވެ. އޭނާވެސް ހަޤީޤަތުގައި އިނީ ހަމަ އެހާ ހިތްދަތި ވެފަ އެވެ. އޭނާ ޔޫހާގެ ގާތުގައި އިށީދެ ދުރު ބަލަން އިނީ އެވެ.
" މަންމައަށް އަބަދަކު ސިއްރެއް ނުކުރެވޭނެ! ގިނަ ދުވަސް ވާން ވެއްޖެއްޔާ ޖެހޭނީ ހަޤީޤަތަށް ބުނަން! ޑޮކްޓަރ ބުނީ ރަނގަޅު ވާނީ ކޮން އިރަކު ކަމެއް ބުނެދޭކަށް ނޭގެއޭ..... ރަނގަޅު ވާނެ ކަމެއް ވެސް ނޭގެއޭ!"

ނާމީ އަށް ޔޫހާގެ އަތް ތިލައަށް ފިތާލެވުނީ ބޭއިހުތިއާރް ގައެވެ. އެ އަޑު އަހާކަށް ނާމީ އަކަށް ފަސޭހައެއް ނޫނެވެ. ޔޫހާ ނާމީގެ އަތުގެ ތެރެއިން އޭނާގެ އަތް ދަމައި ގަންނާކަށް ނޫޅެ އެވެ. ނާމީގެ ބީހުމުގެ ސަބަބުން ކުރީން އިޙުސާސް ކުރެވުނު އުނދަގޫ ކަމެއް އޭނާ އަކަށް މިއަދަކު އިޙުސާސެއް ނުކުރެވުނެވެ. އިތުރު އެއްޗެއް ނުބުނެ އިރު ގަނޑަކު އެހެން ތިބުމަށް ފަހު ޔޫހާ މޫނުމަތި ފޮހެލައިގެން ކޮޓަރިއަށް ދާން ހިނގައި ގަތީ އެވެ. 

މާހިން އަކަށް ހަދާނެ ގޮތެއް ނޭގުނެވެ. ބައްޕަގެ ރުހުމާއި ނުލާ އެއްވެސް ކަމެއް ކުރާކަށް އޭނާ ބޭނުމެއް ނޫނެވެ. މިމީގެ އެއްވެސް ކުށެއްވެސް ނެތް އިރު މިމީއާ ދުރަށް ދާކަށް ވެސް ބޭނުމެއް ނޫނެވެ. އެހެން ނޫނަސް މިހާރު އޭނާއަށް މިމީއާއި ދުރަށް ދިއުމަކީ ފަސޭހަ ކަމަކަށް ނުވާނެ އެވެ. ބައްޕަގެ އެ ނިންމުމުގެ އަސްލު ސަބަބު ބުނެދިން ނަމަވެސް ކިހާ ރަނގަޅު ހެއްޔެވެ! މިމީގެ ނުވަތަ މިމީގެ އާއިލާގެ ކުށެއް އޮތަސް ބުނި ނަމަ ކިހާ ރަނގަޅު ހެއްޔެވެ! އޭރުންވެސް މާހިންއަށް މިމީއާއި ދުރަށް ދާން ތަންކޮޅެއް ފަސޭހަ ވާނެ އެވެ. 

ރޭގެ ފަހުން ކިތަންމެ ފަހަރަކު މިމީ ގުޅައިފި އެވެ. ދައްކާނެ ވާހަކަ އެއްވެސް މާހިން އަކަށް ނޭގެ އެވެ. ކައިވެނީގެ ހުވަފެންތައް ދެކޭތާ ދުވަސް ތަކަކަށް ފަހު ކައިވެނި ކުރާ ހިސާބަށް ގޮސްފައި ބައްޕަ ނުގަބޫލު ވެގެން ދުރަށް ދާން މަޖުބޫރު ވެއްޖޭ ބުނެވޭނީ ވެސް ކިހިނެއް ހެއްޔެވެ! މިހާރު ވެސް ފޯނުގައި މިމީގެ ވިހި ކޯލު މިސް ވެފައި އެބަ އިނެވެ. މިމީއަށް އެހެން ހަދަން ހެޔޮވާނެ ހެއްޔެވެ! ހަދާނެ ގޮތެއް އެއް ގޮތަކަށް ވެސް ނޭގުނެވެ. ލަފައެއް ދޭން ބޭބެ ގާތު އެހުމުންވެސް ބުނީ ބައްޕަ ގާތުގައި ސަބަބު އަހާ އޮޅުން ފިލުވުމަށެވެ. އެކަން ކުރެވޭނެ ގޮތެއް ވެސް ނެތެވެ. 

" ހިނގާ އިހަށް ދެދުވަހަކަށް ބޭރަށް ގޮސްލަން!"
މާހިން ގެ އެ ވިސްނުން ދާއިން އަށް ވަރަށް ކަމުދިޔަ އެވެ. އޭނާވެސް އެގޮތް ބޭނުން ވެގެން އުޅޭތާ ކިތަންމެ ދުވަހެކެވެ.
ދާއިންގެ އެދުމަށް ބެންޤަލޫރަށް ދާން މާހިން ވެސް އެއްބަސް ވިއެވެ. ބޭބެ އެހާ ވަރުން ބެންޤަލޫރަށް ދާން ބޭނުންވި ސަބަބު މާހިން އަށް އިނގެއެވެ. މާހިންއަށް އުފަލެއް ނުލިބުނު ތާނގައި ބޭބެގެ ހިތް ހަމަ ޖެހުނަސް އޭނާއަށް ރަނގަޅެވެ. އެހެން ނޫނަސް ޔޫހާއާއި ލޫނާގެ ހާލު ބަލާލަން އޭނާވެސް ބޭނުން ވިއެވެ. ފުރުމުގެ ކުރީން މާހިން މިމީއަށް ފޮނުވީ މެސެޖެކެވެ. އެތައް ފަހަރަކު ގުޅައިގެން ޖަވާބުވެސް ނުދީ، މެސެޖަކަށް ވެސް ޖަވާބެއް ނުދީ ހުރެފައި ދުވަސް ކޮޅަކަށް ރާއްޖޭން ބޭރަށް ދަނީ ކަމަށް ލިއެފައި މެސެޖެއް ފޮނުވި ހިސާބުން މިމީގެ ހިތުގައި ޝައްކު އުފެދުނެވެ. ކޮންމެވެސް ކަމެއް ޔަޤީނުން ވެސް ގޯސް ވެއްޖެ އެވެ. އެހެން ނަމަވެސް އަދި އެއްވެސް ވާހަކައެއް ބައްޕައަށް ނާންގާ މަޑުކޮށްލުމަށް އޭނާ ނިންމި އެވެ. ﷲ އިރާދަކުރެއްވީތީ އޭނާއަކީ ކެތްކުރަން ދަންނަ އަންހެން ކުއްޖެކެވެ.

އެނދުގެ ހެޑްބޯޑުގައި ލެނގިލައިގެން ޔޫހާ އިނީ ވިސްނުމަކަށް ގެއްލިފަ އެވެ. ނާމީ އަށް އައިސްފައިވާ ބަދަލު އޭނާއަށް މިއަދު ރަނގަޅަށް ފެނިއްޖެ އެވެ. ކުރެވުނު ކުށް ނާމީ އަށް އިޙުސާސް ކުރެވިފައިވާކަން ޔަޤީން ވަނީ ހަމަ އެކަނި ނާމީގެ މިޒާޖަށް އައި ބަދަލަކުން ނޫނެވެ. ކޮއްކޮއާއި ދޭތެރޭގައި މިހާރު އޭނާ ބަހައްޓާ އޯގާތެރި ކަމަކުން ވެސް ނޫނެވެ. ޔޫހާއާއި ދޭތެރޭގައި ކުރިން އޭނާ ދެކެމުން އައި ގޮތްވެސް މިހާރު ބަދަލު ވެފައިވާކަން ޔޫހާއަށް އިނގޭތީ އެވެ. އެއީ ޔޫހާއަށް ލިބުނު ހިތްހަމަ ޖެހުމެކެވެ. މިހާރު ޔޫހާ ބޭނުން ވަނީ ދާއިން އަވަހަށް އަންނާށެވެ. ޔޫހާއަށް އެހީތެރި ކަމުގެ އަތެއް ފޯރު ކޮށްދޭށެވެ. ހިތްވަރު ދޭށެވެ. އެހެން ނަމަވެސް ދާއިން މިފަހަރު މާލެ ދިއަ ފަހުން ޚަބަރެއް ވެސް ނުވެއެވެ. ހިތުގައި ބިރުވެރި ކަމެއް އުފެދެނީ އެހެންވެ އެވެ. ދާއިން އަށް ކޮންމެވެސް އެހެން ކަމެއް މަޖުބޫރު ވީ ބާއޭ ހިތަށް އަރައެވެ. ނޫނީ ދާއިން ޔޫހާ ހަނދާން ނައްތާލީ ބާއޭ ވެސް ހިތަށް އަރައެވެ. ރާއްޖޭގެ ކޮންމެ އަންހެނަކު ދާއިންއަށް ޓަކައި ފިދާވާ ފަދަ ހުރިހާ ސިފައެއް ދާއިންއަށް ލިބިފައި ވާއިރު ޔޫހާ ހަނދާން ނައްތާލުމަކީ ދާއިންއަށް މާ އުނދަގޫ ކަމަކަށް ނުވާނެ އެވެ. އޭގައި ޔޫހާގެ މައްސަލަ އެއްވެސް އެބަ އޮތެވެ. ޔޫހާގެ ހިތުގައި ވާ އެއްޗެއް އަދިވެސް ދާއިންގެ ކުރިމަތީގައި ހާމަ އެއް ނުކުރެ އެވެ. ޔޫހާ ދާއިން އަށް އެދޭ ކަމެއް ދާއިން އަށް އަދިވެސް ޔަޤީނެއް ނުވާނެ އެވެ. ޔޫހާއަށް ދާއިން ގެއްލިއްޖެ ނަމަ އެކަމުގައި ކުށްވެރި ވާން ޖެހޭނީ ހަމަ ޔޫހާ އެވެ. ޔޫހާ ކަންބޮޑުވި އެވެ. އޭނާ މިހާރު ބޭނުން ވަނީ ދާއިން ގާތުގައި އޭނާގެ ހިތުގެ ޝުއޫރުތައް ބަންޑުން ޖަހާލާނެ ފުރުސަތެކެވެ. ދާއިން އާއި ގުޅުނުހާ އަވަހަކަށް ޔޫހާ އޭނާގެ ހިތުގައި ކެކި އުތުރި އަރަމުންދާ ލޯބީގެ އިޙުސާސްތައް ހާމަ ކުރާނެ އެވެ. އެހެނަސް އެފުރުސަތު ދެން އޭނާއަށް ލިބޭނެ ބާއެވެ!

ރޫމްގެ ދޮރުގައި ދެފަހަރަކު ޓަކި ޖަހާލި އަޑު އިވުމުން ކަންނެތް ގޮތަކަށް އައިސް ޔޫހާ ދޮރު ހުޅުވާލި އެވެ. ދޮރުމަތީގައި ހުރި އިސްކޮޅުން ދިގު އެ ރީތި ސޫރަ ފެނުމުން ޔޫހާއަށް ލިބުނީ ސިހުމެކެވެ. ދެލޯ ބޮޑުވެގެން ދިއައީ ޤަބޫލު ކުރަން ދަތިވި ވަރުންނެވެ. އޭނާގެ ހިތުގެ އަޑު އެހާ ފަސޭހައިން ދާއިން އަށް އިވުނީ ހެއްޔެވެ! ޔޫހާގެ ލޮލުގެ ތެރެއަށް ކަރުނަ ތިކިތައް ގިނަ ވެގެން ދިއައީ ހަލުވި ކަމާއި އެކުގަ އެވެ. ދާއިންގެ ދިގުވެފައިވާ ތުނބުޅިއާއި މިލާފައިވާ މޫނު ފެނުމުން ޔޫހާގެ ހިތުގައި އިތުރު ރިހުމެއް އުފެދުނެވެ. ކުއްލިއަކަށް ކުރިއަށް ޖެހިލުމާއި އެކު ޔޫހާއަށް ދާއިންގެ ގައިގައި ބައްދައި ގަނެވުނީ އިޙުތިޔާރަކާއި ނުލަ އެވެ. ދާއިންއަށް ލިބުނީ މާ ބޮޑު ސިހުމެކެވެ. ދާއިންގެ ބޮލުން ފެށިގެން ފައިގެ ކުޑަވާ އިނގިއްޔާއި ހަމައަށް ހީބިހި ނަގައިގެން ދިއަ ވަގުތު ކޮޅެކެވެ. ޔޫހާގެ ހަށިގަނޑުގެ ހޫނުކަން އިޙުސާސް ކޮށްލެވުން އެއީ ދާއިންގެ ދުވަސްވީ ހުވަފެނެކެވެ. އެހެނަސް ކުއްލިއަކަށް އެލިބުނު ފުރުސަތު ބަލައިގަންނަން އޭނާގެ ހަށިގަނޑު ހިނދު ކޮޅެއް ނެގި އެވެ. ހަށިގަނޑުގެ އެކި ދިމަދިމާއިން ކަރަންޓުގެ އޮއިވަރު ދަތުރު ކޮށްލި ގޮތުން ފަޅި ސުކުންތެއްގެ ތެރޭގައި ހުރިހާ ހިއްސުތަކެއް ޖަޒުބާތުން ފުރާލައިފި އެވެ. ހޫނު ފޮނި އިޙުސާސެކެވެ. ނިމުމެއްނެތި ދެމިގެން ދާން ބޭނުންވި ވަގުތު ކޮޅެކެވެ. ދާއިންގެ ހުރިހާ ރިހުމަކަށް ޝިފާ ލިބިއްޖެހެން ހީވި އެވެ. ޔޫހާގެ އެހަރަކާތުން ޔޫހާ އޭނާއަށް ކެތްތެރި ކަމެއް ނެތި ކުރި އިންތިޒާރު ދޭހަ ވެގެން ދިއަ އެވެ. 

ދާއިން ޔޫހާގެ އެ ތުނިތުނި ހަށިގަނޑު އިތުރަށް ގާތްކޮށްލަމުން ދާއިންގެ ހަށިގަނޑުގައި ޖައްސާ ބާރު ކޮށްލީ ދެ ހަށިގަނޑު ވަކިކޮށްލަން ދަތި ވާހާ ބާރަށެވެ. ދުލުން އިއުތިރާފް ވުމެއް ނެތި ދެ ހިތުގައި ވާ ވަރުގަދަ ލޯބީގެ އަސަރުތައް ދެ ހަށިގަނޑަށް އިޙުސާސް ވެގެން ދިއައެވެ. 

ކޮޓަރީގެ ދޮރުފަތް ހުޅުވާލި ވަގުތު ފެނުނު މަންޒަރުން ނާމީ އަށް ހުއްޓެވުނެވެ. ކުޑަ ހިނދު ކޮޅަކު އެތަނުގައި ހުރެފައި އޭނާ އަވަސް އަވަހަށް އެތެރެއަށް ވަދެ ދޮރު ލައްޕާލި އެވެ. ކުރީން އޭނާގެ ހަށިގަނޑުގެ ލޭ ހޫނުވެގެން ދިއަ ނަމަވެސް މިއަދަކު އެފަދަ އެއްވެސް އަސަރެއް ނެތެވެ. އޭނާގެ ހިތުގައި ރުޅިވެރި ކަމެއް، ހަސަދަވެރި ކަމެއްވެސް ނެތެވެ. ޔޫހާއަށްޓަކައި އޭނާގެ ހިތުން ދެވުނު މަޤާމް މިހާރު ވަނީ އެހެން ފަރާތަކަށް ދެވިފައި ކަން ކަށަވަރެވެ.

ހިނދު ކޮޅަކަށް ފަހު ޔޫހާ ދާއިންއާއި ދުރަށް ޖެހިލަމުން ދާއިންއާއި ހަތަރު ކަޅި ހަމަކޮށްލި އެވެ. އޭރު ޔޫހާގެ ދެލޮލުން ކަރުނަ އޮހޮރެމުން ދިއަ އެވެ. 

ޔޫހާގެ ހިތްދަތި ވެފައިވާ ގިނަ ސަބަބުތައް ދާއިން އަޑުއެހީ ހާސްކަމާއި އެކުގަ އެވެ. ކޮއްކޮއަށް ދިމާވެފައި އެވާ ހާލަތު ދާއިންއަށް ކިޔައި ދިނުމަށް ފަހު އެވާހަކަ އެންމެ ތަފްސީލްކޮށް އެއްވެސް އެހެން މީހަކަށް ނޭންގުމަށް ޔޫހާ އެދުނެވެ. ކޮއްކޮ އަކީ ބޭނުން ކެނޑިފައި ވާ އަންހެނެއްގެ ގޮތުގައި އެއްވެސް މީހަކު ޤަބޫލު ކުރާކަށް ޔޫހާ ބޭނުމެއް ނޫނެވެ.

ކޮޓަރީގެ ތެރެއަށް ދާއިން ވަންއިރު ހައިފާ އިނީ އެނދުގައި އިށީނދެ އެވެ. ބޭރުގައި ކޮންމެވެސް މީހަކު އުޅޭކަން އެނގިގެން އިންތިޒާރުގަ އެވެ. ދާއިން ފެނުމުން ހައިފާގެ މޫނު އުޖާލާ ވެގެން ދިއައެވެ. ހީވީ އެތައް ދުވަހެއް ވަންދެން އިންތިޒާރު ކޮށްކޮށް ހުރި ދަރިއަކު ފެނުމުގެ ނަސީބު ލިބުނު ހެންނެވެ. ދާއިން ސަލާމް ކޮށްލަން ދިއްކޮށްލި އަތުގައި ހިފުމަށް ފަހު ހައިފާ ގާތުގައި ދާއިން ބޭންދީ އޯގާތެރި ކަމާއި އެކުގަ އެވެ.

" ދެން އަވަހަށް އަހަރުމެން ގޮވައިގެން މާލެ ދާން ހިނގާ!"
ހީވީ ދާއިން އައީ އެމީހުން ބަލައި ހެންނެވެ. މަންމައަށް ލޫނާގެ ހާލަތު ރަނގަޅަށް ނޭގެނީ ހެން ދާއިން އަށް ހީވިއެވެ.
" މިތަނުގަ ހުންނަން ވެއްޖެއްޔާ މިކަހަލަ ކޮންމެސް ކަމެއް އަބަދުވެސް ލައިގަންނާނެ.... ކޮއްކޮ ހޮސްޕިޓަލުން އަވަހަށް ނެރިގެން މާލެ ހިނގާ!"
ފިރިހެން ދަރިއެއްގެ ގާތުގައި ޝަކުވާ ކުރާފަދަ ގޮތަކަށް ހައިފާ ބުންޏެވެ. ދާއިން އެއްޗެއް ބުނަން އަނގަ ހުޅުވާލުމުގެ ކުރީން އަނެއްކާވެސް ހައިފާ ވާހަކަ ދެއްކި އެވެ.
" ބައްޕަ ވެސް ހޯދޭނީ އޭރުން! "
ޔޫހާއާއި ދާއިންގެ މޫނު މައްޗަށް ކުއްލި ބަދަލެއް އައެވެ. އަނެއްކާ މަންމަގެ ސިކުނޑި ރަނގަޅު ބާއެވެ! އެމީހުންނަށް ވީގޮތް ހައިފާއަށް ފެނުނެވެ. އެ އަސަރުތައް ނުވިސްނޭހާ އޭނާގެ ސިކުނޑި ގޯހެއް ނޫނެވެ. 

" މަންމަ ޤަބޫލެއް ނުކުރަން ބައްޕަ މަރުވީ ކަމަކަށް، އަދި އަންނާނެ! "
ބައްޕަ ގެއްލުނީއްސުރެ މިއަދާއި ޖެހެންދެން ވެސް މަންމަގެ އުއްމީދަކީ އެއީ އެވެ. އެއީ މަންމަގެ ދިރި ހުރުމުގެ ބާރެވެ. ޔޫހާމެން ދެރަވެދާނެތީ އެވާހަކަ އާންމުކޮށް ނުދެއްކި ނަމަވެސް ތާ އަބަދު ބައްޕައާއި ދޭތެރޭގައި މަންމަ ވިސްނާކަން އެކުދީންނަށް އިނގެ އެވެ. މަންމަގެ ބަލީގެ އަސްލަކީ ވެސް އެއީ އެވެ. ބައްޕަ މިދުނިޔެއާއި ވަކި ވެއްޖެ ކަން ޤަބޫލު ނުކުރެވޭހާ ހިނދަކު މަންމަގެ ބަލި މުޅީން ރަނގަޅެއް ނުވާނެ އެވެ. ހިތާމަތަކާއި ކުރިމަތިވާ ހިނދު މަންމައަށް މާބޮޑަށް ބައްޕަ ހަނދާން ވަނީ ކަން ދާއިން އަށް ވިސްނުނެވެ.

ދާއިން މަންމަގެ ބޮލުގައި ފިރުމާލީ ލޯތްބާއި އެކުގަ އެވެ. ފުރަތަމަ ދުވަހުއްސުރެ ޔޫހާގެ މަންމައާއި ދާއިންއާއި ދެމެދުގައި ވަނީ އަޖައިބެއް ފަދަ ގާތް ކަމެކެވެ.

" އިރާދަ ކުރެއްވިއްޔާ ވަރަށް އަވަހަށް މާލެ ދެވޭނެ!" 
ދާއިންގެ އަނގައިން އެހެން ބުނެލުމުން ވެސް ހައިފާ ހިތްހަމަ ޖެހުނެވެ. 

ޝަމްސުގެ ފަރާތުން ލޫނާއަށް ލިބުނު އަނިޔާގެ ސަބަބުން ދިމާވެފައިވާ ސިއްހީ ހާލަތުގެ ޚަބަރު މާހިންއަށް ލިބުމުން އޭނާގެ ލޭ ހޫނު ވެގެން ދިއަ އެވެ. އޭނާ ބޭނުން ވަނީ ޝަމްސު ކުދިކޮށް ކޮށާލާށެވެ.
" ތީ ވަރުގަދަ ޝަމްސް އެއްތާދޯ! ސަލާމަތެއް ނެތެންނުން!"
ރުޅި ގަދަވި ވަރުން ކައިރީގައި ހުރި ކޮފީ ޓޭބަލް ގައިވެސް އޭނާ ފައިން ޖެހި އެވެ. ލޫނާއަކީ ޅަ ފުރާނަ އެކެވެ. ސުވާލު އުފެދޭ މަދު ކަންތައްތަކެއް ހުއްޓަސް ލޫނާ އަކީ ތޯހިރު އަންހެން ކުއްޖެއް ކަން އޭނާއަށް އެނގެ އެވެ. ބައްޕަގެ ވާހަކަ އިވިފައި ނުވާނަމަ އޭނާވެސް ލޫނާއާއި ދޭތެރޭގައި ވިސްނީހެވެ. އޭނާގެ ހިތުގައި ލޫނާއަށް ޤަދަރެއް ދެވުނެވެ. އެއީ ހަޤީޤަތެކެވެ. ލޫނާގެ ހާލަތު އެނގުމުން މިއަދު މާހިންގެ ރުޅިވެރިކަން އިންތިހާއަށް ގޮސް ހިތުގައި އެވަރަށް އެރިއްސައިގެން ސަބަބަކީ އެއީ އެވެ. 

މާހިން އަވަސްވެ ގަތީ ހޮސްޕިޓަލްއަށް ދާށެވެ. ލޫނާ ފެންނަ ހިސާބަށް ނުގޮސް ދެން އޭނާ އަކަށް އެންމެ ހިނދު ކޮޅަކުވެސް ކެތެއް ނުވާނެ އެވެ.