"ހަޔާތުގެ ކޮންމެ އަމަލެއް ﷲ ސުބުހާނަހޫ ވަތައާލާގެ ރުހިވޮޑިގަތުން ހޯދުމަށް ކުރެވޭ ކަމަކަށް ހަދައިފިއްޔާ ތިބާއަށް އާޚިރުގައި ލިބޭނީ ބާއްޖަވެރިކަމާއި ނަސީބެކެވެ. އެންމެ ވަގުތެއްވެސް ބޭކާރުގޮތުގައި ހޭދަނުކޮށް ވަގުތުގެ ބޭނުން ހެޔޮގޮތުގައި ހިފާށެވެ."
***
"އަދި އިޔާންގެ ކޮއްކޮ ކަޒްޔާއާއި ވަރަށް ގުޅޭ. އަމަން.......އޭނަގެ ގާލްފްރެންޑަކަށްވެސް ވެވިދަނެ. ދެން ކިހާ ބޯރިން ލައިފެއްގައި ކަޒްޔާ ތިއުޅެނީ؟ ކޮޓަރީގައި އެކަނިމާ އެކަނި ތިހެން އިނީމަ މޮޔަވާނެ. އެންމެ ރަގަޅުގޮތްތައް މިބުނެދިނީ. ސިޓީ ލައިފް ނުލާހިކު މަޖާ. ޕާޓީތަކާއި ރެސްޓޯރެންޓްތަކަށް ގޮސް ތި އޭޖްކުއްޖެއްހެން އުޅެބަލަ. މުސްކުޅި މާމަގަނޑެއްހެން ބެކްވާޑް ތިންކިން ހުރީމަ ކަޓު...." ކައިޝާ އޭނަގެ ދަބަހުގައި އޮތް މޭކަޕް ސެޓް ދައްކައިލިއެވެ. "ބޭނުންތަ؟ އަމަންއަށް ފެނިލަން މޭކަޕްކޮށްލައިގެން ދާން..."
"އައިމް މެރީޑް......." ކަޒްޔާ ސީރިޔަސްވެލިއެވެ.
"ހަހަހަ......މެރީޑް އޯ....." ކައިޝާ ބިނދިބިނދިފައި ހޭން ފެށިއެވެ. ކަޒްޔާ ޖެހިބުދެއްހެން ބަލަން އިނީ ކައިޝާ މިވަރަށް ހޭންވީ ސަބަބެއް އޮޅުން ނުފިލާފައެވެ. "ކުޑަކުދިން މެރީކުރޭތަ؟ޕްރެގް ވިނަމަ ދެން ކިހިނެއް ހަދާނީ...."
"އޭރުން ވާނެގޮތެއް އެނގޭނީ އެހެން ވި ނަމަތާ..."
"ހޫމް ދެން ތިވާހަކައެއް ނޫނޭ. އިޔާން ގާތު ކީކޭ ބުނަންވީ އިންޓަވިއުދޭނަން؟" ކައިޝާ އަހައިލިއެވެ.
"ސޮރީ ޑިއަރ ސިސް..އިންޓަވިއު ނުދީގެން އަހަންނާއި ނޯއާގެ އެންމެން މަރައިލިޔަސް ތިހާ މައްޗަކަށް ނުދާނަން," ކަޒްޔާ ތުން ފިތާލިގޮތަށް ލޯ އަޅާލައިފިއެވެ.
***
ނަފީސާއާއި ޝިފާގެ މިޒާޖުގައި އެއްގޮތްކަމެއް ހުރެފައި ކަޒްޔާއާއި މެދު އެހާ ނުބައިކޮށް އަމަލުކުރާއިރު އެދެމީހުން ތިމާގެކަމެއް ކަޒްޔާ ނުދެނެހުއްޓެވެ. ޝިފާއަކީ ނަފީސާގެ ދައްތައެއްގެ ދަރިއެއްކަން އެނގުނީ އެހެން ޚާދިމާއެއްކަމަށްވާ ގަމަރިއްޔާ ބުނީމައެވެ. ކަޒްޔާއަށް ކާން ގެންގޮސް ދިނުމުގައި އެމީހުން ހަވާލުވެ ތިބޭއިރު ކަޒްޔާއަށް ކާން ގެންގޮސްދެނީ އެމީހުން ކައިފާ ބާކީވާ އެތިކޮޅެވެ. އެއިން ކަމެއް ބަލާނެ މީހެއް ނުހުރެއެވެ. ޝެފަކު ހުރެގެން ރަނގަޅަށް ކައްކާ ގެއެއްގައި ކަޒްޔާއަށް އެގޮތަށް ކާންގެންގޮސްދޭތީ ހިތް ހަމަނުޖެހިގެން ގަމަރިއްޔާ ސިއްރުން އެހީވާން ފެށިއެވެ. ކޮންމެ ގަޑިއެއްގައި ނިކަން ސިއްރުން ޕިއްޒާކަހަލަ އެއްޗެއްސާއި މޭވާ ފޮރުވައިގެން ގެންގޮސްދޭންފެށިއެވެ.ކަޒްޔާ ޝުކުރުވެރިވިއެވެ. ކާހިތް ނުވާއިރުވެސް އެހާވަރުން ގެނެސްދޭ އެއްޗަކަށް ނޫނެކޭ ބުނާކަށް ނުކެރުނެވެ.
އެދުވަހު ހަވީރުވެސް ޝިފާ ސައިތަށްޓަކާއި ބިސްކޯދު އުރައަކާއި ދެ ބަޖިޔާ އަޅާފައި ހުރި ތަށްޓެއް ކޮޓަރިއަށް ލާފައި ދިޔަފަހުން ގަމަރިއްޔާ ވަނީ ނިކަން ސިއްރުނެވެ. ތަންކޮޅެއް ހަށިގަނޑު ބިޔަކޮށް ހުރެފައި އާތްރައިޓިސްއާއި ލޭމަތިވުމުގެ މައްސަލަ ދިމާވެ ހިނގުމުގައި އުދަގޫކަމެއްވެސް ހުރެއެވެ.
"ކޯންޗެއް ގަމަރިއްޔާ ދައްތަ މިއަދު ގެނައީ؟ "ކަޒްޔާ ހުރީ ކެލިގްރާފީއަށް ގެއްލި ހުސްވެފައެވެ.
"ސަބްމެރިންކޮޅަކާއި ޓްރެސް ލެޗެސް ކޭކުގަނޑެއް.....ނަފީސާމެން އަމަލުކުރާގޮތް މިގޭ ބޮޑެތި މީހުންނަށް ނޭގެނީކަމަށްވާނީ....ވަރަށް ދެރަވޭ ކޮއިފުޅު އުޅޭ ހާލު ފެނުނީމަ....." ގަމަރިއްޔާ ގާތަށް ދިޔައެވެ.
"ޖަޒާކަﷲ ޚައިރަން. ގަމަރިއްޔާ ދައްތަމިހާ މީރު އެއްޗެހި ގެނެސްދޭތީ...."
"އަހަރެން މިތަނަށް އަންނަކަން އެނގިއްޖެއްޔާ ހަދާލާނެ ގޮތެއްވެސް ނޭގޭ...."
"މި ކިހިނެއްވާނެ......"ގަމަރިއްޔާ އަތުގައި ދެން އޮތް ކޮތަޅުން ނެގީ ފޯނެކެވެ. ފޯނުގެ ފޮށްޓާއެކު އޮތުމުން އެއީ އާ ފޯނެއްކަން އެނގުނެވެ. އޭނައާއި ހަމަޔަށް ފޯނެއް ގެނައުންވެސް އޮންނަނީ މަނާވެފައެވެ. އޭނަ ބައްޕަ އަދި އާއިލާއާއި ގުޅުމެއް ބާއްވަފާނެތީ އެމީހުން އޭނަ ހަވާލުކޮށްފައިވާ ނޯކަރުންވެސް އެހާ ހަރުކަށްޓެވެ.
"ތިއީ ދައްތަގެ އާ ފޯނުތަ؟" ކަޒްޔާވެސް އައިސް ސޯފާގައި އިށީނެވެ.
"ނޫން. މިއީ ކޮއިފުޅަށް ދޭން ގެނައި ހަދިޔާއެއް. ފޯނެއް ނުދީ އަނިޔާކުރާކަން ދައްތަ ދެނެހުރިން. ލޮލުގެ ފެނުން ސަކަރާތްވިޔަސް އަދިވެސް ﷲ އިރާދަކުރެއްވިއްޔާ މިއުޅޭ ޅަކުދިންނަށްވުރެ ކަންފަތް ތޫނު..." ގަމަރިއްޔާ އެފޯނާއެކު ސިމްކާޑުވެސް ދިނެވެ. "ދައްތައަކަށް މި ލައްވާކަށް ނޭނގޭ. ދައްތަގެ ތިމާގެ މީހެއްގެ ދަރިއެއް ލައްވާ މި ފޯނު ގެނުވީ,"
"ސުބުހާނަﷲ. އެހެންމީހުންގެ ފީލިންގްސްތައް ކޮންމެ މީހަކަށް ނޭގޭނެ. ދައްތާ. އިރާދަކުރެއްވިއްޔާ ކޮންމެވެސް ދުވަހަކު މީގެ އަގު އަދާކުރާނަން. ފޯނަކަށް ވަރަށް ބޭނުންވެފައި މިހިރީ...." ކަޒްޔާ ތެޅިފޮޅިގެން އަވަހަށް ސިމް ލައްވައިފިއެވެ. ދެރައީ ހަނދާނުގައި އެއްވެސް މީހެއްގެ ނަމްބަރު ރައްކާނުކުރެވުނު ކަމެވެ. އަދި ވައިފައިވެސް ނެތްކަމެވެ. ނަމަވެސް މިއީ އަނދިރި ކަމުގެ ތެރެއިން ފެނުނު އުއްމީދުގެ ކަންޏެކެވެ. ކަޒްޔާއަށް ގަމަރިއްޔާގެ ގައިގާ ބައްދައިލެވުނެވެ. އެ ހަށިގަނޑުގައި ހިފާފައިވީ އޭނަގެވެސް މާމަގެ ގައިގާ ދުވާ ވަހެވެ. އޭނައަށް އިރުކޮޅެއްވަންދެން ބާރަށް ބައްދާލައިގެން އިނދެވުނެވެ.
"ދައްތަ ދިޔައީ...މެޑަމް ފަހަރެއްގައި ވާގޮތަކުން ގެއަށް ވަދެފައި މި ކޮޓަރިއަށް ވަންކަން އެނގިއްޖެއްޔާ ދައްތަ މިގެއިން ނެރެވެސް ލާނެ..."
"މިގަޑީގައި ޝިފާމެން ކޮންތާކު އުޅޭނީ...."
"ސައިބޮއިގެން އެމީހުން ހަވީރު ފިނިބުރު ޖަހަން ދޭ. އަނެއްކާ ގެއަށް ވަންނާނީ އިރުއޮއްސުނީމަ...އެހެން ކުދިންވެސް ގޭގައި ނޫޅޭ. ދައްތަ މީ ގޭގެ ހައުސްކީޕަރަށް ވީމަ ތަޅުދަނޑިތަކާއި ހުރިހާ އެއްޗެއް އަތުގައި ހުރޭ...އަދި އަރްކާން ކުޑައިރު ދައްތަ އޭނަ ބެލީ...ނެނީއަކަށް ވީމަ ވަރަށް އަޅައިލިން. އެހެންވެ އެ ދަރީގެ ހިތުގައި ކޮންމެވެސް ވަރެއްގެ ގަދަރެއް އޮވޭކަން ނޭގޭ...އެކަމަކު އެކުއްޖާގެ ބައްޕަމެންގެ ސަބަބުން ތަފާތު މިޒާޖެއްހުރޭ. އޭނަގެ އެއްވެސް އިހުސާސެއް ނުދައްކާނެ. ހިތް ހަރީ ބާވައޭވެސް ހިތަށް އަރާ. ކުޑައިރު ހަމަ ވަރަށް ލޯބި ބަސްއެހި ކުއްޖެކޭ އެވެސް...." ގަމަރިއްޔާ ކަޒްޔާގެ ބޮލުގައި ފިރުމާލާފައި ދާން ހިނގައިގަތެވެ.
ކަޒްޔާގެ މޫނުން އެތައް ދުވަހެއް ފަހުން ހަގީގީ އުފާވެރިކަމެއް ފެނުނެވެ. ގަމަރިއްޔާ އެކަމާ ނިކަން އުފާވެ ހިތަށް ފިނިކަމެއް ލިބުނެވެ.
މިއޮތް ބޮޑު ރީތި ގޭތެރޭގައި ކުޑަ އަންހެންކުއްޖަކަށް އަނިޔާ ލިބެމުންދާކަން އެހެން މީހަކު ދަންނާނެހެއްޔެވެ؟ ސަބަބަކީ އެކުއްޖާ ދީނަށް އުޅޭތީއެވެ. ބުރުގާ އަޅާތީއެވެ. މައިންބަފައިން ސާލިހު ދަރިއެއް ލިބުމުން އުފާކުރާންވީ ނޫންހެއްޔެވެ؟ މައިންބަފައިން މިއަދު ލޯ މަރައިލިޔަސް އެ ދަރިފުޅުގެ ދުއާތައް އަބަދަށްޓަކާ ދެމިގެންވާ ސަދަގާތަކަށް ވާނެއެވެ. މުއްސަދިން ދުނިޔޭގެ ކެހިވެރިކަމާއި ދަޅަތަކުގައި ޖެހި ޣާފިލުވެފައި ތިބެނީއެވެ.
***
އަރްކާން އޭނަގެ އެކުވެރިޔާ ސައިފްގެ ފޯނަށް ކްރެޑިޓު ޓްރާންސްފާ ކޮށްލައިފިއެވެ. "ހަގީގަތް އެއްވެސް މީހަކަށް އެނގިގެން ނުވާނެ. ޔަހްޔާ މަރައިލިކަމުގެ ކުށް ސާބިތުކޮށް އެ ސޮރު ޖަލަށް ލީމަ އެނިމުނީ. ސަރުކާރުން އެކަން އިތުރަށް ތަހުގީގެއްވެސް ނުކުރާނެ. މިކަހަލަ އެކްސްޓްރީމިސްޓުން ގިނަވެގެން ދުނިޔޭގައި އުޅެން ދަތިވެއްޖެ."
ސައިފްގެ އަންހެނުން ނުސްްރާ އެވާހަކަ ވަގުތުން ސައިފްގެ ބޮޑުދައިތަ ގަމަރިއްޔާއާއި ހިއްސާކުރިއެވެ. އަރްކާން ޔަހްޔާ ގަތުލުކުރުމުގައި އެހީވެދިން ކަމަށް ޝައްކު ކުރެވޭ ކަމުގައި ބުނެލުމުން އެވާހަކަ އެއްގޮތަކަށްވެސް ގަބޫލުކުރާކަށް ފަސޭހައެއްނުވިއެވެ. ޔަހްޔާއަކީ އެންމެން ދަންނަ މަޝްހޫރު ހަމްޒާގެ ދަރިއެއްކަމުން ނޫސްތަކުގައި އެވާހަކަ ނިކަން ހޫނުކޮށް ދެކެވުނެވެ. އަދިވެސް ޔަހްޔާގެ ގާތިލު ނުހޯދިގެން އިންސާފު ނުލިބިގެން އެތައް ބަޔަކު ސޯޝަލް މީޑިއާގައި އެވާހަކަ ދައްކަނީއެވެ. ޔަހްޔާގެ އާއިލާއިން އެކަމާ ހިމޭނުން ތިބިސަބަބެއްވެސް ނޭގުނެވެ.
"އަހަރެން ތިވާހަކަ ގަބޫލުކުރާނީ ކިހިނެއް...އަރްކާން ތަރުބިއްޔަތުކުރީ އަހަރެން. ތަރުބިއްޔަތުގައި ކޮން ގޯހެއް އޮވެގެން އެހިސާބަށް ދާނީ. ދައްތައަށް ހިޔެއްނުވޭ. އަދި ފައިސާ ޓްރާންސްފާކޮށްފައި ޔަހުޔާގެ ވާހަކަ ދެކެވުނަސް އޭނަ ފަންޑުކުރާނެއޭ މަށެއް ނުބުނާނަން...އެއީ ބަލިމީހުންނަށް ޚިދުމަތްކުރާ ޑޮކްޓަރެއް. އިންސާނިއްޔަތުކަން ހުންނާނެ. މީހުންނަށްޓަކާ ތާ އަބަދު ޚިދުމަތުގައި އަތުކުރި އޮޅާލާފައިވާ ދަރިއަކު ކަމަކާއި ނުލައި ފުރާނައެއް ގަތުލެއްނުކުރާނެ. ނޫން ނޫން. ނުސްރާއަށް އޮޅުނީ...އިތުރު މީހެއްގެ ގާތުވެސް ތި ވާހަކަ ނުދައްކާތި..." ގަމަރިއްޔާގެ ހިތް ކުދި ކުދިވާވަރުވިއެވެ.
"ގަމަރިއްޔާއްތަވެސް ސައިފް ގާތު ނުކިޔައްޗޭ. އޭނަ މާ ސިއްރުން އުޅޭތީ ފޯނު ބަލައިލެވުނުއިރު ފެނުނު މެސެޖަކުން ޝައްކުވީ. ޕާސްވޯޑްނުވެސް ބުނޭ އެކަމަކު ސިއްރުން ބެލީ...." ނުސްރާ އެދުނެވެ. އަރްކާންއަކީ އަމިއްލަ ދަރިއެއްފަދައިން ބަލައި ބޮޑުކުރި ޒުވާނަކަށް ވާހިނދު އަދި ތިމާގެ ބައެއްގެ ބަހަށް ހެއްލިގެން އެހާ ފަސޭހައިން އެކުއްޖާއާމެދު ހިތް ނުބައިކުރަން ހެޔޮނުވާނެއެވެ. ޔަހްޔާގެ އަންހެނުންގެ ބައްޕަ ޝޭޚު ހަމްޒާއަކީ ގަމަރިއްޔާ ގަދަރުކުރާ އިލްމުވެރިޔެކެވެ. އޭނާގެ ދަރުސް އަޑުއެހުމުން ހަޔާތަށް ކިތަންމެހާ ވަރަކަށްވެސް ބަދަލު އައިސް ނަފުސް އިސްލާހުވެއްޖެއެވެ.
***
ޒޭވިއާގެ ބައްޕަގެ ގެ ވިއްކަން ނީލަމަށް ލާފައި އެގެ ގަނެ ބަލަހައްޓަމުން އައީ ޚުދު އޭނައެވެ. އޭނާގެ ބައްޕައަކީ ކްރިސްޓިއަނަކަށްވެފައި މުސްލިމް އާއިލާއެއްގެ އަންހެންކުއްޖެއް ކަމަށްވާ ހީނާ ޚާނާއި ގުޅުމުން އެއާއިލާއިން ވަގުތުން ދެކޮޅުހެދިއެވެ. ނަމަވެސް ހީނާ ޚާން ޒޭވިއާގެ ބައްޕަ ރިޗަޑް ޖޯންސްޓަންއާއެކު ފިލައިގެން ގޮސް އުޅެންފެށީއެވެ. ރިޗަޑްވެސް ހީނާއާއި ކައިވެނިކުރަން ދީން ބަދަލުކޮށް މުސްލިކަމަށްވިއެވެ. އެއާއިލާއިން އެންމެފަހުން ނިންމީ ދަރިފުޅުގެ ހައްގުގައި ރިޗަޑްއަށް މަރުހަބާ ކިޔުމަށެވެ. އެ ކައިވެންޏަށް ޒޭވިއާއާއެކު ހަތަރު އަންހެންކުދިން ލިބުނެވެ. ޒޯއީ ޒެނާ ހެނާ އަދި ހުމާއެވެ. ޒޭވިއާގެ އެއްމާބަނޑުކުއްޖަކު ކޯރަށް ވެއްޓި ގެއްލުމަށްފަހު ޒޭވިއާވީ އެންމެންގެ "ޕްރެޝަސް"އަށެވެ. އިންތިހާއަށް ލޯބިވާ ހަމައެކަނި ފިރިހެން ދަރިފުޅަށެވެ. އެކުއްޖާ ބޭނުން ކޮންމެ ކަމެއްކޮށްދީ ޚާއްސަކުއްޖެއްގެ ގޮތުގައި ބޮޑުވަމުން އައެވެ.
ޒޭވިއާގެ ބައްޕަ ނިޔާވުމަށްފަހު ހީނާ ޚާން އޭނަގެ މަންމަމެން ގާތަށް ބަދަލުވުމަށްފަހު ޒޭވިއާ ބައްޕަގެ ގެ ވިއްކައިލިއެވެ. އޭރު އަންހެންކުދިންވެސް ކައިވެންޏަށްފަހު އެކި ތަންތަނުގައި ހަޔާތުގެ ދަތުރު ފަށައިފިއެވެ.
ޒޭވިއާ, އޭނާ ދާދިފަހުން ހުޅުވި ނައިޓްކްލަބެއްކަމުގައިވާ "ފަޔަރ އެންޑް އައިސް"ކައިރިއަށް އޭނަގެ ފެރާރީ ކާރު ހުއްޓާލާފައި ފޭބިއެވެ. ޑިސެމްބަރު މަހު ފަހުކޮޅަށްވާތީ ފިނިގަދަވެ އަނގައިން އާވި ނިކުމެއެވެ. އޭނަ ލައިގެން ހުރި ހެދުމުގެ ބޭރުން ކޯޓުލައިގެން އަވި އައިނު އަޅާލައިގެން ހުރިއިރު ދެކޭމީހުންގެ ހިތްތަކަށް އަސަރުކުރުވާނެފަދަ ގޮތެއް ލިބިފައިވިއެވެ. ކާރުގެ އަނެއް ފަޅިން ފޭބީ އަރްކާންއެވެ.
"އެރިކް. މަންމަ މިކޮޅަށް އައިސް އުޅޭތީ އަހަރެން ވަރަށް ކަންތައް ބޮޑުވެފައި މިހިރީ. މަންމަ ހިތްހަމަޖައްސަން އަހަރެން މިހާރު ދައްކަން ޖެހެނީ އެހެން ޒޭވިއާއެއް. ފަޅާ އަރައިފިއްޔާ މަންމަގެ ހިތް ހަލާކުވެދާނެ...." ޒޭވިއާ ކޯޓުގެ ޖީބަށް އަތް ޖަހައިލިއެވެ. އަރްކާންވެސް ހުރީ ކެހެރި ހެދުމަކާއެކު ކޯޓެއް ލައިގެންނެވެ.
"އަހަންނާއި ޒޭވިއާ އެކުވެރިކަން އެނގިއްޖެއްޔާވެސް މައްސަލައަކަށް ވާނީ....."
ނުނިމޭ
