ކާރު ދުއްވަމުންދިޔަ އައިވަންގެ ނޭވާ ވަނީ އަވަސްވެފަ އެވެ. ވަކި ހިސާބަކަށް ގޮސްފައި ދުވެލި މަޑުކޮށްލަން މަޖުބޫރުވީ، ކުރިމަތިން ފެންނަން ހުރި އިމާރާތުގެ ތެރެއިން ދުވެފައި ނުކުތް އަންހެން ކުއްޖާ ފެނުމުންނެވެ. އެކުއްޖާ ދުވެފައި އައިސް އެރީ ސީދާ އޭނަ އިން ކާރުގެ ކުރިމައްޗަށެވެ. އައިވަން ބުރަކި ޖައްސައިލި ނަމަވެސް، އެމީހެއްގެ ގައިގައި ކާރުން ޖެހިއްޖެ އެވެ.
"އަނަމް!..." އައިވަންއަށް ބުނެވުނެވެ.
********
އައިވަން ކާރުން ފައިބައިގެން ގޮސް ބެލިއިރު، އެކުއްޖަކު އޮތީ ބަންޑުންވާހެން ވެއްޓިފަ އެވެ. މަޑުމަޑުން އެ ކުއްޖާގެ ހަށިގަނޑު ފުރޮޅައިލަން މަސައްކަތް ކުރަމުންދިޔައިރު، އޭނަގެ ހިތް އޮބިނޯންނަ ވަރަށް ތެޅެމުން ދިޔަ އެވެ. ހިތުގެ ކަނަކުން ބުނަމުން ދިޔައީ އެއީ އަނަމް ކަމުގަ އެވެ. އެކަމަށް އެދި އޭނައަށް ހިތުގެ އަޑިން ދުޢާ ވެސް ކުރެވުނެވެ.
އެކުއްޖާގެ ހަށިގަނޑުގައި އެއްވެސް ހަރަކާތެއް ނެތެވެ. މޫނުމަތިން ދާހިއްލާފައި އޮތުމުން، ބޮލުގެ އިސްތަށިގަނޑު ވަނީ މޫނުގައި ތަތްލާފަ އެވެ. އިނގިލިތަކުގެ ކޮޅުން އެ އިސްތަށިތައް އެއްފަރާތްކޮށްލުމާއިއެކު، އައިވަންގެ ދެލޯ ބޮޑުވީ، އެއީ އަނަމްކަން ކަށަވަރު ވުމުންނެވެ. ކުޑަ ވަގުތުކޮޅެއްގެ ތެރޭގައި އަނަމްއަށް އައިސްފައިވާ ބަދަލުން އޭނަގެ ހައިރާންކަން އިތުރު ވިއެވެ. އަނަމްގެ މޫނުމަތީގައިވާ ދިރުން ގެއްލި، ދެލޯ ކައިރިވެސް ވަނީ ކަޅުވެފަ އެވެ. އެ ރީތި އަންހެން ކުއްޖާ ހީވަނީ މުޅީން ތަފާތު މީހެއް ހެންނެވެ.
އަނަމް އަތްދަނޑި މައްޗަށް އުފުލާލައިގެން ގެނެސް ކާރަށް އަރުވާފައި އައިވަން ވެސް ކާރަށް އަރައި ހަމަޖެހިލި އެވެ. ކުޑަ އިރުކޮޅަކުވެސް އެތަނުގައި މަޑުކުރާކަށް އޭނަ ބޭނުމެއް ނުވި އެވެ.
އައިވަން ކާރު ދުއްވައިލި ތަނާހެން، އަނަމް ނުކުތް އިމާރާތުގެ ތެރެއިން ތިން ފިރެހެނަކު ދުވެފައި ނުުކުތެވެ. އެމީހުން ދިޔައީ މުޅި ސަރަހައްދުގަނޑު ހޯދަމުންނެވެ. އައިވަންއަށް އެ މަންޒަރު ފެނުނީ ކާރުގެ ބިއްލޫރިގަނޑުންނެވެ. ދުވެލި ބާރުކޮށްލާފައި ހުންގާނުގައި އޭނައަށް ބާރަށް ހިފަހައްޓައިލެވުނެވެ. އޭރު އަތުގައި ކޮންމެވެސް ވަރެއްގެ ތުރުތުރުލުމެއް އުފެދިއްޖެ އެވެ.
އަނަމްއަށް ހޭވެރިކަން ވީއިރު، އޮވެވުނީ ހަސްފަތާލުގަ އެވެ. މެސެންތަކުގެ އަޑުން ތަނުގެ ހަމަހިމޭންކަން ގެއްލުވާލާފައި ވިއެވެ. އޭނަ ބިރުންގޮސް ފުންމައިގެން ތެދުވި އެވެ. ވަށައިގެން ހޯދައި ބަލައިލިގޮތުން ހީވީ ބަޔަކު އޭނައަށް ފާރައަށް ތިބިހެން ހީވެގެން ބަލަންފެށި ހެންނެވެ. ލައިގެން ހުރި ހެދުމުގެ އަތުކުރިން މޫނު ފޮރުވަމުން އަނަމް އަވަސް އަވަހަށް އެތަނުން ނުކުތެވެ.
********
ކޮޓަރިއަށް ވަދެވުމާއިއެކު ޝާކިރަށް ދޫކޮށްލެވުނީ ފުން ނޭވާ އެކެވެ. އެނދުގައި އިށީނދެލާފައި އޭނަ ގުޅީ ނަސްމާ އަށެވެ. ފޯނު ނެގި ނަމަވެސް ނަސްމާ ހުރީ ހިމޭންވެފަ އެވެ. ޝާކިރު ކުރާ ސުވާލަކަށް ނޫނީ ޖަވާބެއް ނުދެ އެވެ. އެކަން ފާހަގަވިއެއް ކަމަކު، މަސްލަހަތު ގޯސްވެދާނެތީ، އެ ވާހަކަ ދެއްކުމުގެ ޚިޔާލު ޝާކިރަށް ޖެހުނީ ދޫކޮށްލާށެވެ.
"އަނަމްގެ ޚަބަރެއްވިތަ؟..." ޝާކިރު ސުވާލު ކުރީ އޯގާތެރި ރާގަކަށެވެ.
"ބޮޑުބޭބެއާ ނުގުޅިގެން މިއުޅެނީ..." އަނަމްގެ ޚަބަރެއް ނުވެގެން ހާސްވެފައި ހުރި ނަމަވެސް، ނަސްމާ ހުރީ ވާހަކަ ދައްކާ ހިތްވާ މޫޑެއްގައެއް ނޫނެވެ.
މުނީފާގެ ވާހަކަތަކުން ނަސްމާގެ ހިތުގައި ކުންޏެއް ޖެހިއްޖެ ކަން ޤައިމެވެ. ޝާކިރު ވާހަކަ ދެއްކުމުން ވެސް، އޭނަ ވީ ފާޑެއްގެ ފޫއްސެކެވެ.
"އަހަރެން ބަލާލާނަން... ނަސްމާ ހާސްނުވައްޗޭ... ކިތަންމެ ދުރުގަ ހުއްޓަސް، އަހަރެން ދުނިޔޭގަ ހުރިހާ ހިނދަކު، ތި ދެމައިންނަށް ދެރަގޮތެއް ވިޔަކަ ނުދޭނަން..." ފުން ނޭވާއެއް ދޫކޮށްލަމުން ޝާކިރު ބުންޏެވެ.
ފޯނު ކަނޑާލިއިރު، ނަސްމާގެ ދެލޮލަށް ކަރުނަ ޖަމާވެއްޖެ އެވެ. ޝާކިރުގެ އަޑުގައި ވަނީ ޔަޤީން ކަމެވެ. އެއްވެސް އޮޅުވާލުމެއް ނެތެވެ. އެދެމައިންނަށްޓަކައި އެ ހިތުގައިވާ ލޯބި އެންމެ ލަފުޒަކުން ވެސް އޭނައަށް ސާބިތު ވެއްޖެ އެވެ. މުނީފާ ބުނިހެން ޝާކިރަކީ ގޯސް މީހެއް ހެއްޔެވެ؟ ބޭރުން ރީތި ކުލައެއް ދައްކައިގެން ހުރި، ކުށްވެރިއެއް ހެއްޔެވެ؟ އަބަދުވެސް އޭނައަށް ފެނިފައި ވަނީ ޝާކިރުގެ އޯގާތެރިކަމާއި އަޅާލުމެވެ. އެ ހުރިހާ ދުވަހު އެކީގައި އުޅުނު އިރުވެސް، ދުވަހަކުވެސް ގޯސް ސިފައެއް ފެނިފައެއް ނުވެ އެވެ. ވީއިރު، މީހަކު ދައްކާ ވާހަކައަކުން ފިރިމީހާއަށް ޝައްކު ކުރަންވީ ކީއްކުރަން ހެއްޔެވެ؟ ރަނގަޅު ގޮތަކީ އެކަމާއި ބެހޭގޮތުން ޝާކިރާއި ސުވާލުކޮށް ނުބައި ވަސްވާސްތައް ހިތުން ނެރެ އެއްލައިލުން ކަމުގައި އޭނަ ޤަބޫލު ކުރި އެވެ.
********
މީހަކު ފެންނަ އިރަށް މޫނު ނިވާކުރަމުން، ކުރިއަށް ހިނގަމުންދިޔަ އަނަމްއަށް މާ ދުރަށް ދެވޭގޮތެއް ނުވި އެވެ. ކޮންމެވެސް މީހަކު އޭނަގެ ފަހަތުން އައިސް، އަތުގައި ހިފައި ދަމައިގެންފި އެވެ. އަނަމް ތެޅިގަތް ނަމަވެސް، އެމީހަކު ގަދަކަމުން ކަހަލަ ގޮތަކަށް އޭނަ ގެންގޮސް ކޮޓަރިއަށް ވައްދައި ދޮރު ޖަހައިފި އެވެ. ދޮރުގައި އަނަމް ޖައްސައި ގުޑި ނުލެވޭނޭހެން ހިފަހައްޓައިލި އިރުވެސް، ދެލޯ މަރައި ބާރުކޮށްލައިގެން ހުރެ އޭނަ ތެޅިފޮޅެމުން ދިޔަ އެވެ. ހަޅޭއްލަވައިގަންނަން މަސައްކަތް ކުރި ނަމަވެސް އެކަން ވީ ބޭކާރެވެ. އެމީހެއްގެ ހުށިޔާރު ކަމާއިއެކު އޭނަގެ އަނގަމަތީގައި އަތް އަޅައި އަޑު ބޭރުވިޔަކަ ނުދިނެވެ.
"ޝްޝްޝް.. ޝްޝްޝް."
ކުޑަކުޑަކޮށް ދެލޯ ހުޅުވައިލުމާއިއެކު ފެނުނު ސޫރައަކުން އަނަމްގެ ދެލޯ ބޮޑުވެގެން ދިޔަ އެވެ. ކުރިމަތީގައި އެހުރީ އައިވަން ކަން ޤަބޫލު ކުރަން އޭނަގެ ޒަމީރު ދެކޮޅު ހެދި އެވެ.
އަނަމް ބަލައިލުމާއިއެކު އައިވަން އިޝާރާތް ކުރީ، ދޮރުން ކަނޑާފައިވާ ބަޔަށް ލައްވާފައިވާ ބިއްލޫރިގަނޑާއި ދިމާއަށެވެ. އަނަމް އެދިމާއަށް ބަލައިލި އެވެ. އޭރު އިސްތަށިގަނޑު ދިގުކޮށްފައި ތިބި ދެތިން ފިރެހެނަކު، އެކި ތަންތަން ބަލަމުން އެ ކޮޓަރި އާއި ދިމާއަށް އަންނަމުން ދިޔަ އެވެ.
އަނަމްއަށް އަނެއްކާވެސް ބަލައިލެވުނީ އައިވަން އާއި ދިމާއަށެވެ. ކަންބޮޑުވުން އެކުލެވިފައިވާ ނަޒަރުން އެދުނީ ރައްކާތެރިކަން ދިނުމަށެވެ. އެފަދަ ނުރައްކާތެރި ތަނަކުން އޭނަ ސަލާމަތް އެކުރީ އައިވަން ހެއްޔެވެ؟ ނޫނީ އެއީ އައިވަން އަޑީގައި ހުރެގެން، އޭނަގެ ކިބައިން ބަދަލު ހިފުމަށް ކުޅެލާ ތަމްސީލެއް ހެއްޔެވެ؟
"އެކަމަކު، ކީއްވެ ބަދަލު ހިފަންވީ؟..." އަނަމްގެ ހިތަށް އެރި އެވެ.
ހަމަ އެ ސިކުންތުގައި އެއާޕޯޓުގައި ކަންތައް ހިނގިގޮތް އޭނަގެ ހަނދާނަށް އަންނަން ފެށި އެވެ. އަނެއްކާ އެކަމަށް އައިވަން އޭނަގެ ކިބައިން ބަދަލު ހިފަނީ ހެއްޔެވެ؟ އަނަމްގެ ހިތުގައި ޝައްކުގެ އޮށެއް އިންދުނު ނަމަވެސް، އައިވަން އާއިމެދު ގޯސްކޮށް ހީކުރާކަށް ހިތް އެއްބަހެއް ނުވި އެވެ.
ބިއްލޫރިގަނޑުން ބޭރު ބަލަން ހުރި އައިވަންގެ ފިރެހެންވަންތަ ސޫރަ އެހާ ގާތުން ފެނުމުން، އަނަމްގެ ހިތަށް ގޮތްތަކެއް ވާން ފެށި އެވެ. އެ ހޫނު ނޭވާގެ އިހުސާސް ކުރެވުމުން، ހިތުގެ ތެޅުން އަވަސްވި ކަން އެނގުނެވެ. ތުނިކޮށް ފަޅާފައިވާ ތުނބުޅިން އައިވަންގެ ފިރެހެންވަންތަކަން އިތުރުވެފައި ވިއެވެ. ހިތުގެ އަޑިން އައިވަންއަށް ތައުރީފު ކުރަމުންދިޔަ އަނަމްއަށް އެ މޫނުން ކޮންމެ ގުނަވަނަކަށް ބެލެމުން ދިޔަ އެވެ. ކައިރިކޮށްލެވިފައިވާ ދެބުމަ އާއި ދެލޮލުން ފެންނަމުންދިޔަ ސިހުން އޭނައަށްޓަކައި އައިވަން ކަންބޮޑުވެފައިވާ ވަރު އިހުސާސް ކުރެވުނެވެ.
ދޮރު ކައިރީގައި އުޅުނު މީހުންތައް އެތަނުން ދިޔުމާއިއެކު އައިވަންގެ ނަޒަރު އަނަމްއަށް އަމާޒުވެއްޖެ އެވެ. ކަޅި ޖަހާވެސްނުލައި ބަލަން ހުރި އަނަމް ފެނި އައިވަންގެ ކައިރިވެފައިވާ ދެބުމަ ދުރުވެއްޖެ އެވެ. އެ މޫނުމަތީގެ އަސަރުތައް ބަދަލުވާން ނެގީ ފަޅި ސިކުންތު ކޮޅެކެވެ. އެ މޫނުން މިހާރު ފެންނަމުން އެދަނީ ލޯބި ހެއްޔެވެ؟ ނޫންނަމަ، ހަމްދަރުދީ ހެއްޔެވެ؟
އައިވަންއަށް ހުރެވުނީ އެއް އަތުން އަނަމްގެ ކޮނޑުގައި ހިފަހައްޓާލައިގެންނެވެ. އަނެއް އަތުން ހިފަހައްޓައިގެން ހުރެވުނީ އަނަމްގެ މޫނާއި ދިމާއިން ދޮރުގަ އެވެ. އޭނަގެ ކިބައިން ސަލާމަތްވެގެން ދުރަށް ދެވޭނެ ހަމަ އެއްވެސް ގޮތެއް އެ އަންހެން ކުއްޖާއަކަށް ނެތެވެ. އެކަން އިހުސާސްނުވާ ހާލު އައިވަންއަށް ހުރެވުނީ ޖެހި ބުދެއް ހެން ގުޑިވެސް ނުލަ އެވެ.
"ސޮރީ..."
ހަމަހޭވެރިކަން ވުމާއިއެކު އައިވަން އަވަހަށް އަނަމް އާއި ދުރަށް ޖެހިލައިފި އެވެ. ދެޖީބަށް އަތް ކޮއްޕައިލަމުން އޭނަ އަނަމްއަށް ފުރަގަސް ދިނެވެ. ޤަބުވެފައި ހުރި އަނަމް ދޮރުގައި ތަތްވިގޮތަށް ގުޑިލާންވެސް ނޭނގިފައި ހުއްޓެވެ.
ނަރުހަކު އައިސް ދޮރު ހުޅުވައިލުމާއިއެކު ދޮރާއި ފާރާއި ދޭތެރޭގައި އަނަމް ތާށިވެއްޖެ އެވެ. ފާރުގައި ނިތްކުރި ޖެހުމުން ވީ ތަދުގައި އޭނަގެ އަނގައިން ތޫލި ހަޅޭކެއްގެ އަޑުވެސް ބޭރު ވިއެވެ. ނަރުސްކުއްޖާ ކަންބޮޑުވެފައި އަނަމް އެތަނުން ނެރުނެވެ. އައިވަން ބަލަހައްޓައިގެން ހުރިތަން ފެނުމުން، އަނަމް ލަދުން ހަލާކުނުވީ ކިރިޔާ އެވެ. ނޫންކަމަށް ހަދާލާފައި އަވަހަށް ގޮސް ފާޚާނާއަށް ވަނުމާއިއެކު، އައިވަން ހިފަހައްޓައިގެން ހުރި ހިނިގަނޑު ފަޅައިގެން ދިޔަ އެވެ. ނަރުސްކުއްޖާވެސް ހެމުން އެތަނުން ނުކުމެެގެން ދިޔައީ ހާލަތުގެ ގޮތުން ކަންނޭނގެ އެވެ.
ފާޚާނާގެ ދޮރު ކުޑަކޮށް ހުޅުވާލައިގެން ހުރި އަނަމްއަށް އެ މަންޒަރު ރީތިކޮށް ފެނުނެވެ. އައިވަން އާއި ދިމާއަށް ދެލޯ އަޅައިލުމަށްފަހު، ދެތުންފަތް ފިތައިލި އެވެ. އޭނައަށް މަލާމަތްކޮށްފައި ހޭން އައިވަން އަކީ ކާކު ހެއްޔެވެ؟ އޭނައަށް ވެގެންވާނަމަ، އައިވަންއަށް އެވަރުގެ ލަނޑެއް ދިނީހެވެ.
ނޫމާން ގުޅަން ފެށުމުން، ފޯނު ކަންފަތުގައި ޖަހައިގެން އައިވަން ނުކުތީ ބޭރަށެވެ. އޭނަ ނުކުތުމާއިއެކު އަނަމް ވެސް ފާޚާނާއިން ނުކުމެއްޖެ އެވެ. ކޮޓަރި ތެރޭގައި ދެކޮޅަށް ހިނގަހިނގައި ހުރިއިރު، އޭނަ ވިސްނަމުން ދިޔައީ ހެދޭނެ ގޮތަކާއި މެދުގަ އެވެ. އައިވަންގެ އެހީތެރިކަން ބޭނުން ނުވި ނަމަވެސް އެ ނޫން ގޮތެއް އޭނައަކަށް ނުވެސް ނެތެވެ. އަތަކު ފައިސާއެއް ނުވަތަ ގާތް މީހަކާ ގުޅޭނެ އެއްވެސް ގޮތެއް ވެސް ނެތެެވެ.
އަނަމް އެހެން ހުއްޓައި ކޮޓަރީގެ ދޮރު ހުޅުވައިލި އަޑު އިވުނެވެ. ފަސްއެނބުރި ބަލައިލަން އުޅެފައިވެސް އޭނަ ހުރިގޮތަށް ހުރީ އެތެރެއަށް ވަނީ އައިވަން ކަމަށް ހީކޮށެވެ.
********
"ކޮބާ ކަލޭ؟..." ހޮސްޕިޓަލުގެ ތެރެއަށް ވަދެގެން އައި ނޫމާން ވާހަކަ ދެއްކީ ފޯނު ކަންފަތުގައި ޖަހައިގެން ހުރެ އެވެ.
"މިދަނީ ތިރިއަށް..." އައިވަން އެހެން ބުނެފައި ފޯނު ކަނޑާލި އެވެ. ސިޑި އާއި ދިމާއަށް ހިނގާފައި ދިޔަ ނޫމާން ފެނުމުން އޭނަ ހުއްޓުނެވެ.
"ގެއަށް ފުލުހުން އައިސް އެބައުޅޭ... އެތަން ފެނިގެން މަ މިއައީ، ގެއަށް ނުވެސް ވަދެ..." އައިވަން އާއި އަރާ ހަމަކޮށްފައި ނޫމާން ބުންޏެވެ. އޭނަގެ ނިއްކުރިމަތީން ވަނީ ދާ ހިއްލާލާފަ އެވެ. "ކިރިޔާ ބިރުން ހަލާކުނުވެ މިހުރީ... ނަސީބެއްނު އެމަންޖެ ފެނުނު ކަން... އެހެން ނޫންނަމަ ގޮޅީގަ ކަންނޭނގެ މިހާރު އޮންނާނީ..."
"އާނ... މިހާރު ނޭނގޭ ވޯންޓެޑް ލިސްޓަށް ނާރުވާނެ ކަމެއްވެސް..." ޖެއްސުމުގެ ރާގަކަށް އެހެން ބުނެފައި އައިވަން ގޮސް ވަނީ ލިފްޓަށެވެ.
ހިނިގަނޑެއް ޖަހައިލަމުން ނޫމާންވެސް އައިސް އައިވަންގެ ފަހަތުން ލިފްޓަށް ވަނެވެ.
********
އަނދިރި ކޮއްޓެއް ކަހަލަ ގުދަންގަނޑުގެ ކަނަކަށް ބިތްޖެހިފައި އިން ރާވިންއަށް މާނޭވާ ލެވެނީ އެވެ. ބިރުން ގޮސް މުޅި ހަށިގަނޑު ތުރުތުރު އަޅަ އެވެ. ފޯނު ރިންގްވާން ފެށި އަޑު މުޅި ތަނުގައި ގުގުމައިލީ ރާވިން އެހެން އިންދަ އެވެ.
ރާވިން ދިޔައީ ސިއްސައިގެންނެވެ. ޖީބުގައި އޮތް ފޯނު ނެގި އިރު ކުރިއަށްވުރެ ބޮޑަށް އަތް ތުރުތުރު އަޅަން ފަށައިފި އެވެ. އަވަސްކުރަން ހަދައިގެން ފޯނު އަތުން ދޫވެ، ބިންމައްޗަށް ވެއްޓިއްޖެ އެވެ. ދެވަނަ ފަހަރަށް ފޯނު ނެގުމުގެ ކުރިން ކޮންމެވެސް މީހަކު އެ ފޯނު އަތުލައިފި އެވެ.
ރާވިން އުޅުނީ ތެދުވާށެވެ. އޭގެ ކުރިން އެމީހަކު އޭނަގެ އަނގަމަތީގައި ޖެހި ޖެހީނުން ބިންމައްޗަށް ތިރިކޮށްލައިފި އެވެ.
********
"ދޫކުރޭ!... ދޫކުރާށޭ!..." އަނަމް ހަޅޭއްލަވަން ފެށި އެވެ.
އޭނަގެ ގައިގައި ހިފަހައްޓައިގެން ތިބި ދެ ފިރެހެނުން ކުރިއަށްވުރެ ބާރަށް ހިފަހައްޓައިލި އެވެ. ގުޑިލިޔަސް، ދެއަތަށް ވާން ފަށާ ތަދަކުން އަނަމް ހުރީ ގުޑިލަންވެސް ނުކެރިފަ އެވެ. އެތަނުން އެކަކު އޭނާގެ ޖީބުން ނެގި ރުމާ އަނަމްގެ ނޭފަތުގައި ޖައްސައިލި އެވެ. އެއާއިއެކު އަނަމް އެމީހުންގެ އަތްމައްޗަށް ދެމިއްޖެ އެވެ.
އައިވަން މެން ތިބި ލިފްޓްގެ ދޮރު ހުޅުވުނު ވަގުތަކީ، އަނަމް ފުރޮޅުލީ ގޮނޑިއަކަށް އަރުވައިގެން ގެންގޮސް ޖެހިގެން ހުރި ލިފްޓަށް ވެއްދި ވަގުތެވެ.
********
ކޮޓަރި ދޮރުގައި ދެފަހަރަކު ޓަކި ޖަހާލުމަށްފަހު އައިވަން އެތެރެއަށް ވަނެވެ. ކޮޓަރި އޮތް ގޮތް ފެނުމުން، އޭނަގެ ހިތަށް ބިރުވެރިކަން ވަދެއްޖެ އެވެ.
އެނދުގެ ބާލީސް އޮތީ ދުރަށް އެއްލާލާފަ އެވެ. މޭޒުމަތީގައިވާ ބައެއް އެއްޗެހި ވެސް ހުރީ އެކި ހިސާބުތަކަށް އުކާލާފަ އެވެ. އައިވަންގެ ހަނދާނަށް އައީ، އޭނަ ލިފްޓުން ނުކުތް ވަގުތު ފުރޮޅުލީ ގޮނޑިއެއްގައި އިން މީހަކު ގެންގޮސް ލިފްޓަށް އެރުވި މަންޒަރެވެ.
ވަކި އެއްޗެއް ބުނުމެއްނެތި، އައިވަން ދުވެފައި ކޮޓަރިން ނުކުތެވެ. ވާނުވާ ނޭނގިފައި ނޫމާން ވެސް އައިވަންގެ ފަހަތުން ދިޔަ އެވެ. ލިފްޓްގެ ކައިރީގައި ދިގު ކިޔޫއެއް އޮތެވެ. އެތަން ފެނި، އަވަސް ކުރަން އައިވަން ދިޔައީ ސިޑި އާއި ދިމާއަށެވެ. ފަހަރަކު ސިޑިއެއް ގިރާ ކުރަމުން ދިޔައިރު، އޭނަގެ ހިތް ވަނީ އަވަސް ވެފައެވެ.
(ނުނިމޭ)
